ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີແຫ່ງ ຣາຊະອານາຈັກກຳປູເຈຍ ພ້ອມຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 6-7 ສິງຫາ 2016 ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ການຮ່ວມມືສອງປະເທດ ລາວ-ກຳປູເຈຍ ໃຫ້ນັບມື້ໜັກແໜ້ນ ແລະ ເຂັ້ມແຂງຍິ່ງຂຶ້ນ.
ວັນທີ 6 ສິງຫາ 2016 ຢູ່ຫ້ອງວ່າການສຳນັກງານນາຍົກລັດຖະມົນຕີ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະ ໄດ້ຮ່ວມພົບປະສອງຝ່າຍກັບສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ໂອກາດດັ່ງກ່າວ ສອງຝ່າຍໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືແຈ້ງໃຫ້ຊາບ ເຖິງສະພາບການພົ້ນເດັ່ນໃນການຈັດຕັ້ງປະຕິບັດວຽກງານພັດທະນາເສດຖະກິດ-ສັງຄົມ ເປັນຕົ້ນແມ່ນ ວຽກງານການເປັນປະທານອາຊຽນ ແລະ ເປັນເຈົ້າພາບຈັດກອງປະຊຸມສຸດຍອດອາຊຽນຂອງ ສປປ ລາວ ໃນປີ 2016 ພ້ອມນັ້ນ ສອງຝ່າຍຍັງໄດ້ຫາລື ແລະ ເຫັນດີສືບຕໍ່ຊຸກຍູ້ການປັກຫຼັກໝາຍຊາຍແດນ ລະຫວ່າງປະເທດຢູ່ 4 ຈຸດ ທີ່ຍັງບໍ່ທັນສຳເລັດ ບັນຫາການໂອນນັກໂທດລະຫວ່າງປະເທດ ໂດຍສອງຝ່າຍຈະຊຸກຍູ້ໃຫ້ພາກສ່ວນກ່ຽວຂ້ອງ ດຳເນີນວຽກງານດັ່ງກ່າວໃຫ້ຖືກຕ້ອງ ແລະ ເໝາະສົມທີ່ສຸດ ເພື່ອປະຕິບັດນະໂຍບາຍທາງດ້ານມະນຸດສະທຳຮ່ວມກັນ ວຽກງານການສ້າງທາງເຊື່ອມຈອດສອງປະເທດ ສອງຝ່າຍເຫັນດີສືບຕໍ່ການກໍ່ສ້າງເສັ້ນທາງ ແລະ ຂົວເຊລຳເພົາ-ຕຸນເລຣໍເປີ ທີ່ມີຄວາມຍາວ 145 ແມັດ ແລະ ເສັ້ນທາງເຊື່ອມຕໍ່ຈາກເມືອງມູນລະປະໂມກ-ຂົວເຊລຳເພົາ ຄວາມຍາວ 72 ກິໂລແມັດ ໃຫ້ສຳເລັດຕາມແຜນການ ນອກນັ້ນ ສອງຝ່າຍຍັງເຫັນດີສືບຕໍ່ໃຫ້ການສະໜັບສະໜູນຊ່ວຍເຫຼືອກັນ ແລະ ກັນໃນເວທີທັງພາກພື້ນ-ສາກົນ.
ແຫຼ່ງຂ່າວ Pathedlao lao
