ຂໍ້ຄິດກ່ຽວກັບເລື່ອງອັງກິດລາອີຢູ ( ຄໍລຳ ເບິ່ງກວ້າງເຫັນໄກ )

# ວິເສດ ສະແຫວງສຶກສາ

    ຂ່າວເດັ່ນດັງທີ່ຍັງເປັນຄວັນຫລົງກິ່ນເຫລືອໃນເວທີສາກົນຢູ່ດຽວນີ້ ກໍຄືເລື່ອງການຖອນສຳມະໂນຄົວອອກຈາກສະຫະພາບເອີຣົບ (ອີຢູ-EU) ຂອງອັງກິດຜ່ານການລົງປະຊາມະຕິໃນເດືອນມິຖຸນາຜ່ານມາ. ໃນປັດຈຸບັນ ໂລກຍັງຕິດຕາມຂະບວນການຖອນຕົວຈິງ ເຊິ່ງຄາດວ່າຈະແກ່ຍາວເປັນເວລາ 2 ປີ ຈຶ່ງຈະສຳເລັດ. ຄວາມເປັນຫ່ວງຂອງຫລາຍປະເທດຕໍ່ເຫດການທີ່ບໍ່ຄາດຝັນນີ້, ສ່ວນໜຶ່ງກໍຍ້ອນຢ້ານວ່າມັນຈະສົ່ງຜົນກະທົບແບບຕ່ອງໂສ້ມາສູ່ປະເທດຂອງຕົນ ຫລື ຕໍ່ລະບົບການເມືອງ ແລະ ເສດຖະກິດໂລກ ເພາະໃນຍຸກໂລກາພິວັດນີ້, ເຫດການທີ່ເກີດຂຶ້ນໃນຈອກແຈໜຶ່ງຂອງໂລກນັ້ນມັນສະເທືອນໄປທົ່ວໂລກ. ຍັງມີອີກຫລາຍປະເທດທີ່ເປັນຫ່ວງນຳອະນາຄົດຂອງບັນດາປະເທດທີ່ມີການຮ່ວມກຸ່ມກັນຄ້າຍໆກັບອີຢູ ເພາະຢ້ານວ່າຖ້າບໍ່ຖອດຖອນບົດຮຽນ

ໄວ້ດີໆ ປະຫວັດສາດອາດຈະຊ້ຳຮອຍອີກ. ຍ້ອນແນວນີ້ ທາງການຂອງຫລາຍປະເທດຈຶ່ງອອກຄຳເຕືອນກ່ຽວກັບບັນຫານີ້ໄວ້ ເຊັ່ນຫວ່າງບໍ່ດົນມານີ້,ລັດຖະມົນຕີກະຊວງການຄ້າຂອງອິນໂດເນເຊຍ ກໍໄດ້ຮຽກຮ້ອງໃຫ້ອາຊຽນຖອດຖອນບົດຮຽນຈາກເຫດການອັງກິດຖອນຕົວອອກຈາກອີຢູ. ທ່ານວ່າຈຸດທີ່ອາຊຽນຄວນເບິ່ງຄັກໆ ກໍຄືການສ້າງປະຊາຄົມໂດຍຖືເອົາຜົນປະໂຫຍດຂອງປະຊາຊົນໃນແຕ່ລະປະເທດເປັນໃຈກາງແທ້ໆ, ການສ້າງແຜນການກໍຄືສັນຍາຕ່າງໆຕ້ອງໃຫ້ປະຊາຊົນມີສ່ວນຮ່ວມນຳຢ່າງກວ້າງຂວາງ, ຕ້ອງເອົາໃຈໃສ່ຊົນຊັ້ນກຳມະກອນ ເພື່ອບໍ່ໃຫ້ອາຊຽນກາຍເປັນອົງການທີ່ຮັບໃຊ້ແຕ່ຄົນໃນສັງຄົມໄຮໂຊ (ສັງຄົມຊັ້ນສູງ). ຢູ່ໄທ, ທ່ານ ສາຖິດ ລິມພົງພັນ ອະດີດຫົວໜ້າຫ້ອງການກະຊວງການເງິນໄທ, ອະດີດປະທານຕະຫລາດຮຸ້ນໄທ ມີຄຳເຫັນວ່າ: ການຖອນໂຕຂອງອັງກິດອອກຈາກອີຢູນັ້ນຊີ້ໃຫ້ເຫັນວ່າ ອີຢູໄປຜິດທາງ ຄືບໍ່ສາມາດສະໜອງຜົນປະໂຫຍດທາງເສດຖະກິດໃຫ້ໝົດປະເທດສະມາຊິກໄດ້. ທ່ານກ່າວຕື່ມວ່າ: ຈຸດທີ່ຜິດພາດກໍຄືຕອນອີຢູຢ່ວງຂ້າມເປົ້າໝາຍການເປັນຕະຫລາດຮ່ວມມາເປັນອົງການການເມືອງໜຶ່ງດຽວ ເຊິ່ງພາໃຫ້ເກີດມີຂໍ້ຂັດແຍ່ງ ເພາະນັ້ນບໍ່ແມ່ນເປົ້າໝາຍດັ້ງເດີມຕາມສັນຍາທີ່ບັນດາປະເທດສະມາຊິກຮັບຮອງເອົາໃນເບື້ອງຕົ້ນ. ທ່ານວ່າ ອາຊຽນຄວນໃສ່ໃຈຫລັກການເຄົາລົບອະທິປະໄຕຂອງແຕ່ລະປະເທດສະມາຊິກ, ຢ່າຊ້ຳຮອຍອີຢູທີ່ບໍ່ສົນໃຈນຳຄວາມບໍ່ໄວ້ວາງໃຈ ແລະ ຄວາມບໍ່ພໍໃຈຂອງປະຊາຊົນ. ສ່ວນທ່ານ ເອີໂດກັນ (Erdogan) ປະທານາທິບໍດີປະເທດຕວກກີ (ເຕີຄີ) ນັ້ນ ໄດ້ຄາດຄະເນໄວ້ລ່ວງໜ້າວ່າ: ສະຫະພາບເອີຣົບຍັງຈະແຕກແຍກກັນຕໍ່ໄປຕື່ມ. ທ່ານກ່າວວ່າ: ການຕົກລົງຂອງປະຊາຊົນອັງກິດໃນການຖອນຈາກການເປັນສະມາຊິກຂອງອີຢູນັ້ນ ເປັນການເລີ່ມຕົ້ນສັກກະລາດໃໝ່, ໂລກທັງໂລກໃຜກໍຄິດວ່າສຽງປະຊາມະຕິຈະເຫັນດີໃຫ້ອັງກິດສືບຕໍ່ຢູ່ກັບອີຢູ, ແຕ່ຜົນອອກມາພັດໄປທາງປີ້ນ. ທ່ານເຕືອນວ່າ: ອີຢູຍັງຈະສືບຕໍ່ແຕກແຍກກັນຕື່ມ ຖ້າບໍ່ປັບປຸງນະໂຍບາຍຂອງຕົນກ່ຽວກັບຊາວອົບພະຍົບ, ກ່ຽວກັບລັດທິຈຳແນກເຊື້ອຊາດ ແລະ ການລັງກຽດຄຽດຊັງສາສະໜາອິດສະລາມ. ທ່ານອອກສຽງຕຳນິອີຢູທີ່ແກ່ຍືດແກ່ຍາວຄຳຮ້ອງຂອງເຕີຄີ ເພື່ອເຂົ້າເປັນສະມາຊິກອີຢູ ເຊິ່ງໄດ້ສະເໜີມາແຕ່ປີ 1987, ໃນປີ 2005 ເຕີຄີ ເລີ່ມຂະບວນກະກຽມເຂົ້າເປັນສະມາຊິກອີຢູ, ແຕ່ກໍຖືກໂຈະມາເລື້ອຍໆ ຍ້ອນມີຫລາຍບັນຫາ. ໃນກາງເດືອນມິຖຸນາຜ່ານມາ,ທ່ານປະທານາທິບໍດີ ເອີໂດກັນ ໄດ້ສະເໜີໃຫ້ລົງປະຊາມະຕິທົ່ວປະເທດວ່າເຕີຄີຄວນສືບຕໍ່ຂັ້ນຕອນກະກຽມເຂົ້າເປັນສະມາຊິກອີຢູ ຫລື ຄວນຢຸດເຊົາເລີຍ.




ທີ່ມາ ລາວພັດທະນາ