ດັ່ງທີ່ພວກເຮົາເຫັນນຳກັນແລ້ວວ່າໃນຫຼາຍວັນຜ່ານມາໄດ້ເກີດມີສະພາບຝົນຕົກແຮງ ແລະ ຕໍ່ເນື່ອງຫຼາຍມື້ຈົນເຮັດໃຫ້ເສັ້ນທາງຫຼາຍຈຸດໃນນະຄອນຫຼວງວຽງຈັນເກີດນ້ຳອັງຂັງຍ້ອນລະບາຍບໍ່ທັນ, ໂດຍສະເພາະແມ່ນຕອນແລງຂອງວັນທີ 2 ກໍລະກົດນີ້, ໄດ້ເກີດມີຝົນຕົກແຮງຈົນເຮັດໃຫ້ຫຼາຍເສັ້ນ ທາງເກີດນ້ຳຖ້ວມຂັງເປັນເວລາຫຼາຍຊົ່ວໂມງ, ເປັນຕົ້ນແມ່ນເສັ້ນທາງຫຼັກ 5 ເຂດຫໍປະຊຸມແຫ່ງຊາດໄປຫາບ້ານພະຂາວໄດ້ມີນ້ຳຖ້ວມຂັງແກ່ຍາວເປັນເວລາຫຼາຍຊົ່ວໂມງ, ຊຶ່ງປະຊາຊົນເຂດນັ້ນເລົ່າໃຫ້ນັກຂ່າວພວກເຮົາຟັງວ່າ: ເຂດດັ່ງກ່າວໄດ້ເກີດນ້ຳຖ້ວມຂັງເລິກປະມານຫົວເຂົ່ານັບແຕ່ເວລາປະມານ 1-2 ໂມງກາງຄືນຂອງວັນທີ 2 ກໍລະກົດນີ້ ແລະ ແກ່ຍາວໄປຈົນຮອດເວລາ 9- 10 ໂມງເຊົ້າຂອງວັນທີ 3 ກໍລະກົດ, ນ້ຳຈຶ່ງລະບາຍອອກໝົດ, ທັງນີ້ອາດເປັນຍ້ອນຮ່ອງລະບາຍໃນເຂດດັ່ງກ່າວສ້າງບໍ່ໄດ້ມາດຕະຖານ ຫຼື ຮ່ອງລະບາຍນ້ຳອຸດຕັນຍ້ອນຂີ້ເຫຍື້ອ, ດັ່ງນັ້ນຈຶ່ງສະເໜີໃຫ້ພາກສ່ວນກ່ຽວຂ້ອງກວດກາຄືນ, ເພື່ອຫາວິທີແກ້ໄຂ ແລະ ບໍ່ສະເພາະແຕ່ເທົ່ານັ້ນໃນມື້ດຽວກັນຍັງມີອີກຫຼາຍເສັ້ນທາງທີ່ເກີດນ້ຳຖ້ວມຂັງຄື: ເສັ້ນທາງເຂດກະຊວງແຮງງານ-ວິທະຍຸແຫ່ງຊາດ, ເສັ້ນທາງຄ້ອຍຕະຫຼາດໂພນສະຫວ່າງ-ຮ້ານອາຫານສາຍໃຈ, ເສັ້ນທາງດອນກອຍ, ລວມທັງອີກຫຼາຍໆເສັ້ນທາງທີ່ເປັນພື້ນທີ່ຕ່ຳ. ເຖິງຢ່າງໃດກໍຕາມສະພາບນ້ຳຖ້ວມຂັງຕາມເສັ້ນທາງໃນຕົວເມືອງນະຄອນຫຼວງວຽງຈັນແມ່ນໄດ້ເກີດຂຶ້ນເປັນປະຈຳທຸກໆປີ ແລະ ໄດ້ສົ່ງຜົນເຮັດໃຫ້ຫຼາຍເສັ້ນທາງເປ່ເພຍ້ອນນ້ຳອັງຂັງ, ຊຶ່ງມັນໄດ້ສະທ້ອນໄປເຖິງການສິ້ນເປືອງງົບປະມານເປັນຈຳນວນຫຼາຍໃນສ້ອມແປງເສັ້ນທາງທີ່ເປ່ເພເຫຼົ່ານັ້ນໃນແຕ່ລະປີ, ດັ່ງນັ້ນພາກສ່ວນກ່ຽວຂ້ອງຄວນຫາວິທີແກ້ໄຂທີ່ມີປະສິດທິພາບກວ່າເກົ່າ, ພ້ອມທັງເລັ່ງກວດກາຄືນຮ່ອງລະບາຍນ້ຳຕາມເສັ້ນທາງທີ່ມັກກີດນ້ຳຖ້ວມຂັງໄດ້ງ່າຍໃນປັດຈຸບັນ, ພ້ອມທັງປົວແປງໃຫ້ດີ, ຮັບປະກັນໃຫ້ການລະບາຍນ້ຳໄດ້ວ່ອງໄວຕາມມາດຕະຖານ.
ທີ່ມາ ລາວພັດທະນາ
