ເຈົ້າໜ້າທີ່ຕຳຫຼວດໜ່ວຍງານສະກັດກັ້ນແລະຕ້ານຢາເສບຕິດ ປກສ ເມືອງທຸລະຄົມ ແຂວງວຽງຈັນ ໄດ້ລົງເຄື່ອນໄຫວແກ້ໄຂປາກົດການຫຍໍ້ທໍ້ຢູ່ ເຂດບ້ານໂພນງາມຜ່ານການ
ລົງເຄື່ອນໄຫວຕົວຈິງສາມາດກັກຕົວພວກຕ້ອງຫາໄດ້ 3 ຄົນຄື: ທ້າວ ກ່ຳ ອາຍຸ 32 ປີ, ທ້າວ ກອງໄຊ (ຫຳ) ອາຍຸ 22 ປີ ທັງສອງວ່າງງານ ຢູ່ບ້ານຂຸດສາມບາດ ເມືອງໄຊທານີ ນະຄອນຫຼວງວຽງຈັນ ຖືກກັກຕົວໃນຄັ້ງວັນທີ 18 ກໍລະກົດ 2016 ແລະທ້າວ ນ້ອຍ ອາຍຸ 42 ປີ ອາຊີບກຳມະກອນ ຢູ່ບ້ານໂພນງາມ ເມືອງທຸລະຄົມ ແຂວງວຽງຈັນ ຖືກກັກຕົວໃນ ຄັ້ງວັນທີ 20 ກໍລະກົດ 2016 .
ຜ່ານການສຶບສວນ-ສອບສວນຂອງເຈົ້າໜ້າທີ່: ທ້າວ ກ່ຳ ໄດ້ຮັບສາລະພາບວ່າຢາບ້າຈຳນວນ 390 ເມັດ ຊຶ່ງເຈົ້າ ໜ້າທີ່ໄດ້ພົບແມ່ນຂອງຕົນເອງແທ້ໄດ້ຊື້ນຳຊາຍຄົນໜຶ່ງບໍ່ຊາບຊື່ຢູ່ບ້ານທ່າກົກ ໄຮ ເມືອງປາກງື່ມ ນະຄອນຫຼວງວຽງ ຈັນ 2 ຖົງ ຈຳນວນເທົ່າກັບ 400 ເມັດ ໃນລາຄາ 3 ລ້ານກີບ ພາຍຫຼັງໄດ້ຢາບ້າແລ້ວຕົນເອງຈິ່ງໄດ້ເອົາມາເຮັດເປັນແພັກ ແພັກລະ 10 ເມັດ ໃນນີ້ ໄດ້ເສບໄປແລ້ວ 10 ເມັດ ຍັງເຫຼືອຈຳນວນ 390 ເມັດ. ຜ່ານມາຕົນເອງເຄີຍຈຳໜ່າຍຂາຍມາແລ້ວ 2 ຄັ້ງ ຄັ້ງນີ້ເປັນຄັ້ງທີ 3 ໃນຂະນະທີ່ກຳລັງຈະເອົາຢາບ້າໄປຈຳໜ່າຍຂາຍໃຫ້ກັບກຸ່ມໄວໜຸ່ມແລ້ວຈິ່ງຖືກເຈົ້າໜ້າທີ່ກັກຕົວພ້ອມຂອງກາງ ຢາບ້າຈຳນວນ 390 ເມັດ.
ສ່ວນ ທ້າວ ຫຳ ໄດ້ຮັບສາລະພາບ ວ່າຢາບ້າຈຳນວນ 342 ເມັດ ຊຶ່ງເຈົ້າ ໜ້າທີ່ກວດຄົ້ນພົບຢູ່ກະຕ່າຂີ້ເຫຍື້ອ ແລະຖ້ວຍໝີ ຢູ່ໃນຫ້ອງນອນແມ່ນເປັນຂອງຕົນເອງແທ້ຢາບ້າຈຳນວນດັ່ງກ່າວທີ່ຊື້ນຳຄົນບໍ່ຊາບຊື່ຢູ່ບ້ານທ່າກົກໄຮ ເມືອງປາກງື່ມ ນະ ຄອນຫຼວງວຽງຈັນ ຈຳນວນ 2 ຖົງເທົ່າກັບ 400 ເມັດ ໃນລາຄາ 2,8 ລ້ານກີບ ຈາກນັ້ນກໍໄດ້ເອົາຢາມາຈຳໜ່າຍຂາຍໃຫ້ກຸ່ມຊາວໜຸ່ມຢູ່ໂຕະສະນຸກເກີ ຈຳນວນ 20 ເມັດ ສ່ວນທີ່ຍັງເຫຼືອກ້ຽມໄປຂ່າຍໃຫ້ກຸ່ມຊາວໜຸ່ມຢູ່ ບ້ານນານົກຂຸ້ມ ກໍເລີຍຖືກເຈົ້າໜ້າທີ່ກັກຕົວພ້ອມຂອງກາງຢາບ້າຈຳນວນ 342 ເມັດ, ຜ່ານມາຜູ້ກ່ຽວແມ່ນໄດ້ເຄື່ອນໄຫວຄ້າຂາຍ ແລະເສບຢາບ້າມາເປັນເວລາ 8 ເດືອນ ແຕ່ລະຄັ້ງແມ່ນໄປເອົາມາຂາຍເທື່ອລະ 30-400 ເມັດ.
ສ່ວນ ທ້າວ ນ້ອຍ ກໍໄດ້ຮັບສາລະພາບຕໍ່ເຈົ້າໜ້າທີ່ວ່າ ຕົນເອງແມ່ນໄດ້ໄປຊື້ຢາບ້າຢູ່ບ້ານເກິນກາງ ເມືອງທຸລະຄົມ ຈຳ ນວນ 30 ເມັດ ໃນລາຄາ 3,9 ແສນກີບ ພາຍຫຼັງໄດ້ຢາມາແລ້ວກໍຂາຍໃຫ້ກັບກຸ່ມຊາວໜຸ່ມຕາມບ້ານໃນລາຄາເມັດລະ 20 ພັນກີບ ຍັງເຫຼືອຈຳນວນ 24 ເມັດ ກໍເລີຍຖືກເຈົ້າໜ້າທີ່ກັກຕົວພ້ອມຂອງກາງຈຳນວນດັ່ງກ່າວຜູ້ກ່ຽວຍັງໃຫ້ການຕໍ່ເຈົ້າໜ້າທີ່ວ່າຜ່ານມາເຄີຍໄດ້ຊື້ຢາບ້າມາຂາຍແລ້ວ 6 ຄັ້ງ ພ້ອມທັງເສບ ແລະກໍເປັນຜູ້ຖືກຊັດທອດທີ່ພົວພັນບັນຫາດັ່ງກ່າວແຕ່ຜູ້ກ່ຽວກໍເອົາຕົວຫຼົບໜີສຸດທ້າຍກໍ່ຖືກເຈົ້າໜ້າທີ່ກັກຕົວມາດຳເນີນຄະດີ.
ຜ່ານການສືບສວນ-ສອບສວນຂອງເຈົ້າໜ້າທີ່ແມ່ນຜິດຕໍ່ກົດໝາຍອາຍາມາດຕາ 146 ແຫ່ງ ສປປ ລາວ ປະຈຸບັນເຈົ້າ ໜ້າທີ່ຕຳຫຼວດໜ່ວຍງາານສະກັດກັ້ນ ແລະຕ້ານຢາເສບຕິດ ປກສ ເມືອງທຸລະຄົມໄດ້ສັງລວມຂໍ້ມູນຫຼັກຖານ ເພື່ອດຳເນີນຄະດີຕາມລະບຽບກົດໝາຍໃນຂັ້ນຕໍ່ໄປ.
