ຂະແໜງທ່ອງທ່ຽວຖືເປັນຂະແໜງໜຶ່ງທີ່ສຳຄັນເພາະສາມາດສ້າງລາຍຮັບໄດ້ສູງເປັນອັບດັບສອງຂອງປະເທດຮອງຈາກຂະແໜງບໍ່ແຮ່, ໂດຍໃນ 5 ປີມານີ້ ສາມາດສ້າງລາຍຮັບໄດ້ 2 ຕື້ກວ່າໂດລາສະຫະລັດຈາກຈຳນວນນັກທ່ອງທ່ຽວເຂົ້າມາຢ້ຽມຢາມລາວທັງໝົດ 18 ລ້ານກວ່າຄົນ.
ອີງຕາມເອກະສານທີ່ລາຍງານໂດຍທ່ານ ບົວເງິນ ຊາພູ ວົງ ຮອງລັດຖະມົນຕີກະຊວງ ຖວທ ຕໍ່ກອງປະຊຸມ ຖວທ ທົ່ວ ປະເທດທີ່ຈັດຂຶ້ນຫວ່າງບໍ່ດົນມານີ້ວ່າ: ລັດຖະບານໄດ້ເອົາ ໃຈໃສ່ພັດທະນາສິ່ງອຳນວຍຄວາມສະດວກ ແລະສ້າງ ເງື່ອນໄຂຕ່າງໆ ເພື່ອດຶງດູດນັກທ່ອງທ່ຽວໃຫ້ເພີ່ມຂຶ້ນໃນແຕ່ລະປີ, ຕາມການລາຍງານສະຖິຕິນັບແຕ່ປີ 2011-2015 ມີນັກທ່ອງທ່ຽວເຂົ້າມາລາວສູງເຖິງ 18,67 ລ້ານຄົນ, ສາມາດສ້າງລາຍຮັບໄດ້ 2,87 ຕື້ໂດລາສະຫະລັດ, ສະເລ່ຍໃນແຕ່ລະປີມີນັກທ່ອງທ່ຽວເຂົ້າມາທ່ຽວລາວປະມານ 3,75 ລ້ານຄົນ, ສ້າງລາຍຮັບປະມານ 575,02 ລ້ານໂດລາ, ໂດຍ ອັດຕາສະເລ່ຍເທົ່າກັບ 8,7% ຕໍ່ປີ.
ສຳລັບປີ 2011 ໄດ້ມີນັກທ່ອງທ່ຽວເຂົ້າມາລາວ 2,72 ລ້ານກວ່າຄົນ, ສ້າງລາຍຮັບໄດ້ 4 ຮ້ອຍກວ່າລ້ານໂດລາ ສະຫະລັດ, ເພີ່ມຂຶ້ນ 7%, ປີ 2012 ມີ 3,33 ລ້ານກວ່າ ຄົນ, ສ້າງລາຍຮັບໄດ້ 5 ຮ້ອຍກວ່າລ້ານໂດລາ, ເພີ່ມຂຶ້ນ 7,2%, ປີ 2013 ມີ 3,77 ລ້ານກວ່າຄົນ, ສ້າງລາຍຮັບ ໄດ້ເກືອບ 6 ຮ້ອຍລ້ານໂດລາ,
ເພີ່ມຂຶ້ນ 8,4%, ປີ 2014 ມີ 4,15 ລ້ານກວ່າຄົນ, ສ້າງລາຍຮັບໄດ້ 6 ຮ້ອຍກວ່າລ້ານໂດລາ, ເພີ່ມຂຶ້ນ 7,9% ແລະ ປີ 2015 ມີຈຳນວນນັກທ່ອງ ທ່ຽວເຂົ້າມາລາວ 4,68 ລ້ານກວ່າຄົນ, ສ້າງລາຍຮັບໄດ້ 7 ຮ້ອຍກວ່າລ້ານໂດລາ ເພີ່ມຂຶ້ນ 13%.
ຈາກການເພີ່ມຂຶ້ນຄືແນວນັ້ນໄດ້ເຮັດໃຫ້ການທ່ອງທ່ຽວເປັນຂະແໜງທີ່ສາມາດສ້າງລາຍຮັບສູງເປັນອັນດັບສອງຂອງປະເທດ ຮອງຈາກຂະແໜງບໍ່ແຮ່, ສະເລ່ຍໄລຍະການພັກເຊົາຂອງນັກທ່ອງທ່ຽວຢູ່ລາວ ແມ່ນ 7 ວັນ, ລາຍຮັບ ຈາກການທ່ອງທ່ຽວປະກອບສ່ວນເຂົ້າ ໃນ GDP ປະມານ 8,7% ຕໍ່ປີ, ຊຶ່ງໄດ້ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມຂອງປະເທດເຮົາໃນລະດັບທີ່ແນ່ນອນ, ຂະນະທີ່ຮອດປີ 2020 ຄາດວ່າຈະມີນັກທ່ອງທ່ຽວເຂົ້າມາທ່ອງທ່ຽວລາວ 6 ລ້ານຄົນ ແລະຈະສ້າງລາຍຮັບສະເລ່ຍ 953 ລ້ານໂດລາສະຫະລັດ, ຕະຫຼາດ ທ່ອງທ່ຽວທີ່ສຳຄັນແມ່ນຈາກຈີນ, ຍີ່ປຸ່ນ, ສ.ເກົາຫຼີ, ອົດສະຕຣາລີ, ໄທ ແລະ ຫວຽດນາມ, ນອກຈາກນີ້ ຍັງມີນັກທ່ອງ ທ່ຽວທີ່ມີລາຍຈ່າຍສູງຈາກເອີຣົບ ແລະ ອາເມລິກາເຊັ່ນ: ຝຣັ່ງ, ອັງກິດ, ເຢຍລະ ມັນ ແລະອາເມລິກາ.
ໂດຍຕົວເລກ ໃນປີ 2014 ທົ່ວປະເທດມີແຫຼ່ງທ່ອງທ່ຽວທັງໝົດ 1.916 ແຫ່ງ, ໃນນັ້ນ ມີແຫຼ່ງທ່ອງທ່ຽວທຳມະ ຊາດ 1.093 ແຫ່ງ, ແຫຼ່ງທ່ອງທ່ຽວວັດ ທະນະທຳ 541 ແຫ່ງ ແລະແຫຼ່ງທ່ອງ ທ່ຽວປະຫວັດສາດ 282 ແຫ່ງ, ໄດ້ສຳ ຫຼວດແລ້ວ 145 ແຫ່ງ, ນອກນີ້ຍັງມີ ແຫຼ່ງທ່ອງທ່ຽວທີ່ໄດ້ຈັດສັນພ້ອມທັງກຳນົດແນວຄວາມຄິດໃນການພັດທະນາ ຈຳນວນ 24 ແຫ່ງ, ມີແຫຼ່ງທ່ອງທ່ຽວມໍ ລະດົກໂລກ 2 ແຫ່ງ, ມີແຫຼ່ງທ່ອງທ່ຽວມໍລະດົກແຫ່ງຊາດທີ່ສຳນັກງານນາຍົກຮັບຮອງເອົາຈຳນວນ 20 ແຫ່ງ.
ທີ່ມາ ເສດຖະກິດສັງຄົມ
