ການແຂ່ງຂັນໂອລິມປິກ 2016 ທີ່ປະເທດບຣາຊິນ ໄດ້ປິດສາກລົງເປັນທີ່ຮຽບຮ້ອຍ ເມື່ອຕອນເຊົ້າຂອງວັນທີ 21 ສິງຫາ 2016 ຜ່ານມານີ້.
1. ນາງ ແລນລີ້ ພຸດທະວົງ ລົງແຂ່ງກິລາແລ່ນ-ລານ ໃນລາຍການແລ່ນ 100 m ຮອບຄັດເລືອກ ໃນວັນທີ 12 ສິງຫາ 2016 ລາວແລ່ນໃນ heat ທີ 2 ເຊິ່ງລາວສາມາດແລ່ນເຂົ້າເສັ້ນໄຊດ້ວຍເວລາ 12,82 ວິນາທີ ເປັນອັນດັບທີ 7 ຂອງ heat ທີ 2 ແລະ ເປັນອັນດັບ 16 ຂອງການແຂ່ງຂັນລາຍການນີ້ ບໍ່ສາມາດຜ່ານເຂົ້າຮອບຕໍ່ໄປ ແຕ່ລາວສາມາດທຳລາຍສະຖິຕິຂອງຕົນເອງທີ່ເຄີຍເຮັດໄວ້ 12,89 ວິນາທີ ໃນການແຂ່ງຂັນລາຍການແລ່ນ 100 m ງານມະຫະກຳກິລາມະຫາວິທະຍາໄລອາຊຽນ ຄັ້ງທີ 18 ທີ່ປະເທດສິງກະໂປ.
2. ນາງ ສິຣິອາຣຸນ ບຸດຈະເລີນ ລົງແຂ່ງກິລາລອຍນ້ຳ ໃນລາຍການ Women’s 50 m freestyle ຮອບຄັດເລືອກ ໃຊ້ເວລາ 32,55 ວິນາທີ ໄດ້ອັນດັບທີ 76 ບໍ່ສາມາດຜ່ານເຂົ້າຮອບຕໍ່ໄປ ແຕ່ລາວສາມາດທຳລາຍສະຖິຕິຕົນເອງທີ່ຜ່ານມາໄດ້ຄື 33,71 ວິນາທີ.
3. ທ້າວ ອາຣິຍາ ພູນສະຫວັດ ລົງແຂ່ງກິລາລົດຖີບ ໃນລາຍການ Men’s road race ໄລຍະທາງ 256,6 ກິໂລແມັດ ລົງແຂ່ງໃນວັນທີ 06 ສິງຫາ 2016 ແຕ່ວ່າໜ້າເສຍດາຍ ລາວປັ່ນບໍ່ຮອດເສັ້ນໄຊຕາມໄລຍະເວລາທີ່ການແຂ່ງຂັນກຳນົດໄວ້.
4. ທ້າວ ສຸກພະໄຊ ສິດທິສານ ລົງແຂ່ງກິລາເທຄວັນໂດ ໃນລາຍການ Men’s -60 kg ຮອບຄັດເລືອກ (Round of 64) ໃນວັນທີ 06 ສິງຫາ 2016 ພາດທ່າເສຍທີໃຫ້ຄູ່ແຂ່ງຈາກ ຈີນໄທເປ ບໍ່ສາມາດຜ່ານເຂົ້າຮອບຕໍ່ໄປ.
5. ທ້າວ ສັນຕິສຸກ ອິນທະວົງ ລົງແຂ່ງກິລາລອຍນ້ຳ ໃນລາຍການ Men’s 50 m freestyle ຮອບຄັດເລືອກ ໃຊ້ເວລາ 26,54 ວິນາທີ ໄດ້ອັນດັບທີ 69 ບໍ່ສາມາດຜ່ານເຂົ້າຮອບຕໍ່ໄປ.
6. ທ້າວ ອານຸສອນ ໄຊສາ ລົງແຂ່ງກິລາແລ່ນ-ລານ ໃນລາຍການ Men’s 110 m hurdles ບໍ່ສາມາດຜ່ານຮອບຄັດເລືອກ (DNS).
ທີມງານ YOULIKELAOS ກໍຂໍສະແດງຄວາມດີໃຈ ແລະ ເປັນກຳລັງໃຈໃຫ້ກັບທັບນັກກິລາລາວທຸກຄົນ ທີ່ໄດ້ເປັນຕົວແທນໃຫ້ກັບປະເທດລາວ ເຂົ້າຮ່ວມການແຂ່ງຂັນກິລາໂອລິມປິກ 2016 ໃນຄັ້ງນີ້. ປະຊາຊົນລາວທຸກຄົນມີຄວາມເອກອ້າງທະນົງໃຈ ແລະ ພາກພູມໃຈທີ່ເຫັນທຸງຊາດລາວ ໂບກສະບັດຢູ່ໃນການແຂ່ງຂັນລະດັບສາກົນ.
ແຫລ່ງຂ່າວໄດ້ມາຈາກ : http://www.vientianemai.net
