ຍ້ອນເຫັນໄດ້ຄວາມສຳຄັນຂອງ ສິນຄ້າທີ່ໄດ້ມາດຕະຖານເພື່ອປົກປ້ອງປະ ຊາຊົນກໍຄືຜູ້ຊົມໃຊ້ ທັງຫຼີກລ້ຽງບັນຫາ ການນຳເຂົ້າ ແລະຈຳໜ່າຍນ້ຳມັນເຊື້ອໄຟບໍ່ມີຄຸນນະພາບ
ລັດຈິ່ງສ້າງເງື່ອນໄຂໃໝ່ດ້ວຍການເປີດການກວດການ້ຳມັນ ເຊື້ອໄຟຢູ່ດ່ານຂົວມິດຕະພາບລາວ-ໄທ 1 ເພື່ອເຮັດໜ້າທີ່ໃນຈຸດນີ້ໂດຍສະເພາະ ແລະຈະນຳໜ່ວຍເຄື່ອນທີ່ລົງກວດກາສູ່ບ່ອນອື່ນເປັນແຕ່ລະໄລຍະນັບຈາກນີ້.
ທ່ານ ວຽງທອງ ວົງທະວິໄລ ຫົວ ໜ້າກົມມາດຕະຖານ ແລະວັດແທກກະ ຊວງວິທະຍາສາດ ແລະເຕັກໂນໂລຊີ ໄດ້ ກ່າວລາຍງານໃນພິທີເປີດການກວດກາ ຄຸນນະພາບນ້ຳມັນເຊື້ອໄຟວ່າ: ກົມມາດ ຕະຖານ ແລະວັດແທກ ໄດ້ສົມທົບກັບບັນ ດາພາກສ່ວນກ່ຽວຂ້ອງສ້າງນິຕິກຳ, ບຸກຄະລາກອນ ແລະພື້ນຖານໂຄງລ່າງ ຂອງຫ້ອງທົດລອງໃນການກວດຄຸນນະພາບນ້ຳມັນເຊື້ອໄຟໃນຄັ້ງນີ້ ກໍເພື່ອຕອບ ສະໜອງຕາມຄວາມຮຽກຮ້ອງຕ້ອງການຂອງສັງຄົມໃນການແກ້ໄຂບັນຫາປະກົດການຫຍໍ້ທໍ້ ແລະປົກປ້ອງຜູ້ຊົມໃຊ້, ເຮັດ ໃຫ້ນ້ຳມັນເຊື້ອໄຟຢູ່ ສປປ ລາວ ມີຄຸນນະພາບຕາມມາດຕະຖານແຫ່ງຊາດກໍຄືສາກົນ ເນື່ອງຈາກໃນຊຸມປີຜ່ານມານີ້ໄດ້ເກີດມີການຮ້ອງຮຽນຈາກພໍ່ແມ່ປະຊາຊົນ, ມີສາຍດ່ວນຕໍ່ສະພາແຫ່ງຊາດ, ຕໍ່ກະຊວງອຸດສາຫະກຳ ແລະການຄ້າ ລວມເຖິງຜູ້ ປະກອບການພາຫະນະກໍໄດ້ສົ່ງຂ່າວຫາກ່ຽວກັບການນຳເຂົ້ານ້ຳມັນເຊື້ອໄຟຄຸນນະພາບຕ່ຳບໍ່ໄດ້ມາດຕະຖານມາຈຳໜ່າຍ.
ດັ່ງນັ້ນ ສູນການກວດກາຄຸນນະພາບນ້ຳມັນເຊື້ອໄຟດັ່ງກ່າວນີ້ ແມ່ນຈະກວດນັບແຕ່ເອກະສານຢັ້ງຢືນຄຸນນະພາບນ້ຳມັນເຊື້ອໄຟທີ່ນຳເຂົ້າ, ເກັບຕົວຢ່າງຈາກລົດບັນທຸກນ້ຳມັນ ເພື່ອກວດຄຸນນະພາບເບື້ອງຕົ້ນຢູ່ດ່ານນຳເຂົ້າ ແລ້ວຈະມີການກວດ ຄຸນນະພາບລະອຽດຢູ່ຫ້ອງທົດລອງຂອງສູນຢັ້ງຢືນມາດຕະຖານ ແລະກວດກາຄຸນນະພາບແຫ່ງຊາດ. ນອກຈາກນີ້ ຍັງຈະດຳເນີນການກວດກາຄຸນນະພາບນ້ຳມັນເຊື້ອໄຟຢູ່ຕາມແຕ່ລະສາງ, ປ້ຳຈຳໜ່າຍນ້ຳມັນເປັນແຕ່ລະໄລຍະອີກ.
ທ່ານຫົວໜ້າກົມກ່າວວ່າ: ສູນກວດກາຄຸນນະພາບນ້ຳມັນເຊື້ອໄຟດັ່ງກ່າວນີ້ ນອກຈາກກວດກາກັບທີ່ແລ້ວຍັງມີລົດ ກວດຄຸນນະພາບເຄື່ອນທີ່ໄວ້ບໍລິການ ຕາມການຮ້ອງຮຽນຂອງປະຊາຊົນຜູ້ຊົມ ໃຊ້ອີກດ້ວຍ.
ພິທີເປີດສູນການກວດກາຄຸນນະ ພາບນ້ຳມັນເຊື້ອໄຟປະຈຳດ່ານຂົວມິດ ຕະພາບລາວ-ໄທ 1 ໄດ້ຈັດຂຶ້ນໃນວັນ ທີ 1 ສິງຫານີ້ ໂດຍການເປັນກຽດເຂົ້າ ຮ່ວມຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ປະທານສະພາວິທະຍາ ສາດແຫ່ງຊາດ, ບັນດາຜູ້ຕາງໜ້າກະ ຊວງ, ກົມ ແລະບໍລິສັດຕ່າງໆເຂົ້າຮ່ວມ.
ທີີິ່ມາ ເສດຖະກິດສັງຄົມ
