ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນສິງຫາ 2016 ໄດ້ຈັດຂຶ້ນແຕ່ວັນທີ 1-3 ສິງຫານີ້ ຢູ່ຫໍສະພາແຫ່ງຊາດ, ເພື່ອພິຈາລະນາບັນຫາສໍາຄັນຈໍານວນໜຶ່ງ ໂດຍພາຍໃຕ້ການເປັນປະທານຂອງທ່ານນາງ ປານີ ຢ່າທໍ່ຕູ້ ປະທານສະພາແຫ່ງຊາດ, ມີບັນດາຫົວໜ້າຄະນະກໍາມາທິການຕ່າງໆ ແລະ ພາກກ່ຽວຂ້ອງເຂົ້າຮ່ວມ.
ກອງປະຊຸມຈະໄດ້ຮັບຟັງການລາຍງານກ່ຽວກັບການປັບປຸງຮ່າງລັດຖະບັນຢັດ ຂອງປະທານປະເທດວ່າດ້ວຍພົນລະເມືອງກິດຕິມະສັກ, ລາຍ ງານກ່ຽວກັບການສັງລວມແຜນການຕິດຕາມກວດກາ ຂອງກໍາມາທິການຕ່າງໆ, ລາຍງານຄວາມຄືບໜ້າຂອງການກະກຽມຮ່າງກົດໝາຍຈໍານວນ 14 ສະບັບ ທີ່
ຈະນໍາເຂົ້າພິຈາລະນາຢູ່ກອງປະຊຸມສະໄໝສາມັນ ເທື່ອທີ I ຂອງສະພາແຫ່ງຊາດຊຸດທີ VIII, ລາຍງານແຜນການສ້າງ ແລະ ປັບປຸງກົດໝາຍປະຈໍາປີ 2017, ຮັບຟັງລາຍງານຜົນການຕິດຕາມກວດກາ ຂົງເຂດເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ລາຍງານກ່ຽວກັບການກະກຽມກອງປະຊຸມສາກົນ ແລະ ການແຕ່ງຕັ້ງຄະນະມິດຕະພາບສະມາຊິກລັດຖະສະພາລະຫວ່າງ ສະພາແຫ່ງຊາດ ສປປ ລາວ ກັບລັດຖະສະພາຕ່າງປະເທດ, ພິຈາລະນາບົດລາຍງານ ຂອງປະທານສານປະຊາຊົນສູງສຸດ ກ່ຽວກັບພຶດຕິກໍາຂອງລັດຖະກອນຕຸລາການຂອງສານປະຊາຊົນເຂດ 1 ແຂວງໄຊຍະບູລີ, ພິຈາລະນາໜັງສືສະເໜີ ປະທານສານປະຊາຊົນສູງສຸດກ່ຽວກັບການແຕ່ງຕັ້ງຍົກຍ້າຍປະທານສານປະຊາຊົນທ້ອງຖິ່ນ ແລະ ຫົວໜ້າກົມຈັດຕັ້ງພະນັກງານສານປະຊາຊົນສູງສຸດ, ຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຄຸ້ມຄອງພະນັກງານຜ່ານປະຕູດຽວ, ພິຈາ ລະນາຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍລະບຽບການບໍລິການເອກະສານຜ່ານປະຕູດຽວ, ພິຈາລະນາມະຕິຂອງຄະນະປະຈໍາສະພາແຫ່ງຊາດ ວ່າດ້ວຍລະບຽບການຄຸ້ມຄອງການນໍາໃຊ້ທຶນຊ່ວຍເຫລືອຫລ້າ ພ້ອມທັງພິຈາລະນາວຽກງານກົງຈັກການຈັດຕັ້ງ ແລະ ບຸກຄະລາກອນພາຍໃນສະພາແຫ່ງຊາດ ແລະ ພິຈາລະນາບົດລາຍງານການສ້າງແຜນງົບປະມານປະຈໍາປີ 2017.ທີ່ມາ ລາວພັດທະນາ
