ການເດີນທາງຢ້ຽມຢາມ ສປຈີນ ຂອງຄະນະຜູ້ແທນລາວ ຊຶ່ງນຳໂດຍທ່ານ ສະເຫຼີມໄຊ ກົມມະສິດລັດຖະມົນຕີກະຊວງການຕ່າງປະເທດ ທັງສອງຝ່າຍໄດ້ປຶກສາຫາລືກັນຫຼາຍປະເດັນ ໂດຍຕົກລົງຈະເພີ່ມທະວີການຮ່ວມມືໃນດ້ານຕ່າງໆ ເພື່ອຊຸກຍູ້ສາຍພົວພັນສອງປະເທດໃຫ້ນັບມື້ເຕີບໃຫຍ່ເຂັ້ມແຂງ ໂດຍສະເພາະດ້ານ ການຄ້າ-ການລົງທຶນແລະທ່ອງທ່ຽວ.
ຕອບສະໜອງຕາມຄຳເຊີນຂອງ ທ່ານ ຫວາງ ອີ້, ລັດຖະມົນຕີຕ່າງປະເທດ ແຫ່ງ ສາທາລະນະລັດປະຊາຊົນ ຈີນ; ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງ ປະເທດແຫ່ງ ສປປ ລາວພ້ອມດ້ວຍຄະນະ ໄດ້ເດີນທາງຢ້ຽມຢາມສາທາລະນະລັດ ປະຊາຊົນຈີນຢ່າງເປັນທາງການໃນວັນ ທີ 2-4 ສິງຫາ 2016 ນີ້.
ໂດຍໃນວັນທີ 3 ສິງຫາທີ່ເຮືອນຮັບ ແຂກຂອງລັດຖະບານຈີນ ນະຄອນຫຼວງ ປັກກິ່ງ, ສປ ຈີນໄດ້ມີການພົບປະສອງ ຝ່າຍລະຫວ່າງ ທ່ານ ຫວາງ ອີ້ ລັດຖະ ມົນຕີຕ່າງປະເທດ ແຫ່ງ ສປ ຈີນ ແລະ ທ່ານ ສະເຫຼີມໄຊ ກົມມະສິດ ລັດຖະມົນ ຕີກະຊວງການຕ່າງປະເທດ ແຫ່ງ ສປປ ລາວ. ໃນການພົບປະຄັ້ງນີ້ ສອງຝ່າຍໄດ້ສະແດງຄວາມຍິນດີ ແລະຕີລາຄາສູງ ຕໍ່ ການພົວພັນຮ່ວມມືລະຫວ່າງສອງພັກ-ສອງລັດ ແລະປະຊາຊົນສອງຊາດ ໃນໄລ ຍະຜ່ານມາທີ່ໄດ້ຮັບການເສີມຂະຫຍາຍ ຢ່າງບໍ່ຢຸດຢັ້ງ ແລະລົງເລິກໃນວຽກງານ ຕົວຈິງຫຼາຍດ້ານ, ຊຶ່ງເຫັນໄດ້ຈາກການແລກປ່ຽນການຢ້ຽມຢາມຊຶ່ງກັນ ແລະ ກັນຂອງຄະນະຜູ້ແທນຂັ້ນສູງຂອງສອງ ປະເທດ ໂດຍສະເພາະແມ່ນການຢ້ຽມ ຢາມຢ່າງເປັນທາງການທີ່ ສປ ຈີນ ຂອງ ທ່ານເລຂາທິການໃຫຍ່, ປະທານປະເທດແຫ່ງ ສປປ ລາວ ບຸນຍັງ ວໍລະຈິດ ໃນ ຫວ່າງບໍ່ດົນມານີ້; ສອງຝ່າຍເຫັນດີສືບ ຕໍ່ຊຸກຍູ້ຮ່ວມກັນໃນການພົວພັນຮ່ວມມືທາງດ້ານເສດຖະກິດ, ການຄ້າ, ການລົງ ທຶນ, ການທ່ອງທ່ຽວ ແລະດ້ານອື່ນໆ, ຊຶ່ງ ໃນປີຜ່ານມາມູນຄ່າການຄ້າສອງຝ່າຍ ໄດ້ບັນລຸເຖິງ 3 ຕື້ກວ່າ ໂດລາສະຫະລັດ, ການລົງທຶນຂອງບັນດາວິສາຫະກິດຂອງ ຈີນ ຢູ່ ລາວ ຈັດຢູ່ໃນອັນດັບ 1 ລວມມີ 760 ໂຄງການ, ລວມມູນຄ່າ 6 ຕື້ກວ່າ ໂດລາສະຫະລັດ,ຈຳນວນນັກທ່ອງທ່ຽວ ຈີນເຂົ້າມາ ສປປ ລາວ ຫຼາຍກວ່າ 1 ລ້ານເທື່ອຄົນ ແລະນັກທ່ອງທ່ຽວລາວ ກໍ່ເຂົ້າມາຈີນຫຼາຍຂຶ້ນ.
ໃນນີ້, ໂຄງການຮ່ວມມື ທີ່ພົ້ນເດັ່ນ ແມ່ນຜົນສຳເລັດຂອງການສົ່ງດາວທຽມລາວດວງທຳອິດຂຶ້ນສູ່ວົງໂຄຈອນ ແລະ ໂຄງການກໍ່ສ້າງ ທາງລົດໄຟ ລາວ-ຈີນ; ສອງຝ່າຍເຫັນດີຈະຈັດກິດຈະກຳຕ່າງໆຮ່ວມກັນ ຢ່າງເປັນຂະບວນຟົດຟື້ນເພື່ອ ສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 55 ປີ ໃນ ປີ 2016 ນີ້ ໃຫ້ມີຄວາມໝາຍສຳຄັນ ແລະມີຜົນສຳເລັດດີ; ເຫັນດີຊຸກຍູ້ພາກ ສ່ວນກ່ຽວຂ້ອງຂອງສອງຝ່າຍ ລາວ-ຈີນສືບຕໍ່ເອົາໃຈໃສ່ຈັດຕັ້ງປະຕິບັດບັນດາແຜນວຽກຕ່າງໆຮ່ວມກັນ ໂດຍສະເພາະແມ່ນ ການຮ່ວມມືກັນຄົ້ນຄວ້າເພື່ອເຮັດໃຫ້ແຜນ ພັດທະນາເສດຖະກິດ-ສັງຄົມ 5 ປີ ຄັ້ງທີ 8 ຂອງລາວ ແລະແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ 13 ຂອງຈີນ ເຊື່ອມເຂົ້າກັນ ໂດຍປິ່ນອ້ອມຍຸດທະສາດ “ໜຶ່ງແລວທາງ, ໜຶ່ງເສັ້ນທາງ” ຂອງຈີນວາງອອກກັບນະໂຍບາຍຫັນປະເທດລາວຈາກປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມຈອດ.
ສປປ ລາວ ຍິນດີຕ້ອນຮັບການນຳ ຂັ້ນສູງຂອງຈີນເດີນທາງໄປຢ້ຽມຢາມ ແລະເຂົ້າຮ່ວມກອງປະຊຸມສຸດຍອດອາ ຊຽນ ແລະກອງປະຊຸມກ່ຽວຂ້ອງອື່ນໆຢູ່ ສປປ ລາວ, ສປ ຈີນ ກໍຍິນດີຕ້ອນຮັັບການ ນຳຂັ້ນສູງຂອງ ສປປ ລາວ ເດີນທາງເຂົ້າ ມາຮ່ວມກອງປະຊຸມ ຈີ-20 ແລະຢ້ຽມ ຢາມຢູ່ ສປ ຈີນ; ສອງຝ່າຍຈະຮ່ວມມືກັນ ຢ່າງໃກ້ຊິດໃນການແກ້ໄຂບັນຫາການ ລັກລອບຄ້າຂາຍຢາເສບຕິດ, ການເຂົ້າ ອອກເມືອງແບບຜິດກົດໝາຍ ແລະບັນ ຫາການຄ້າມະນຸດ.
ນອກຈາກນີ້, ສອງຝ່າຍຍັງໄດ້ຕີລາ ຄາສູງຕໍ່ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງທີ່ໄດ້ມີຄວາມຄືບໜ້າຢ່າງຫຼວງຫຼາຍພາຍຫຼັງທີ່ໄດ້ສ້າງຕັ້ງຂຶ້ນ ມາພຽງ 1 ປີ; ຊົມເຊີຍການຮ່ວມມືຂອງ ອາຊຽນ-ຈີນຕະຫຼອດໄລຍະຜ່ານມາ ແລະ ໃນມໍ່ໆນີ້ຈະມີກອງປະຊຸມສຸດຍອດສະເຫຼີມສະຫຼອງການຮ່ວມມືອາຊຽນ-ຈີນ ຄົບ ຮອບ 25 ປີ ທີ່ນະຄອນຫຼວງວຽງຈັນ.
ໃນການຢ້ຽມຢາມຄັ້ງນີ້, ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ເຂົ້າຢ້ຽມຄຳນັບ ທ່ານ ຢາງ ເຈ້ຍສື ທີ່ປຶກສາແຫ່ງລັດ ສປ ຈີນ. ໃນໂອກາດດັ່ງ ກ່າວທ່ານລັດຖະມົນຕີຕ່າງປະເທດລາວ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ສະແດງຄວາມຂອບໃຈມາຍັງພັກ, ລັດຖະບານ ແລະປະຊາຊົນຈີນ ທີ່ໄດ້ໃຫ້ ການຊ່ວຍເຫຼືອສະໜັບສະໜູນອັນໃຫຍ່ ຫຼວງ ແກ່ ສປປ ລາວມາໂດຍຕະຫຼອດ ໂດຍສະເພາະໃນໂອກາດທີ່ ສປປ ລາວ ເປັນເຈົ້າພາບປະທານອາຊຽນໃນປີ 2016 ນີ້; ພັກ, ລັດຖະບານ ແລະປະຊາຊົນລາວ ຈະພະຍາຍາມຮ່ວມກັບຝ່າຍຈີນ ເພື່ອພ້ອມກັນປົກປັກຮັກສາ ແລະເພີ່ມພູນຄູນ ສ້າງສາຍພົວພັນມິດຕະພາບ ແລະຄູ່ຮ່ວມ ມືຍຸດທະສາດຮອບດ້ານໃຫ້ນັບມື້ໄດ້ຮັບການເສີມຂະຫຍາຍເຂົ້າສູ່ລວງເລິກຕົວຈິງ ແລະມີປະສິດທິຜົນໃນທຸກຂົງເຂດ ວຽກງານເພື່ອຜົນປະໂຫຍດຂອງປະຊາ ຊົນສອງຊາດ, ເພື່ອສັນຕິພາບ, ການຮ່ວມ ມື ແລະການພັດທະນາໃນພາກພື້ນ ແລະ ໃນໂລກ.
