ກອງທັບອາກາດ ສ ອາເມຣິກາ ຖະແຫຼງເມື່ອວັນທີ 2 ສິງຫານີ້ວ່າ ຝູງເຮືອບິນສູ້ຮົບ F-35 ທຳອິດທີ່ຜະລິດໂດຍກຸ່ມບໍລິສັດ Lockheed Martin ໃຫ້ແກ່ເຫຼົ່າທັບດັ່ງກ່າວ ໄດ້ມີຄວາມພ້ອມໃນການສູ້ຮົບແລ້ວ ຊຶ່ງເປັນຂີດໝາຍໃນໂຄງການພັດທະນາເຮືອບິນລຸ້ນໃໝ່ຫຼ້າສຸດຂອງ ສ ອາເມຣິກາ ທີ່ໄດ້ປະເຊີນກັບການຖືກໂຈະມາຫຼາຍຄັ້ງ.
ນີ້ຖືວ່າເປັນບາດກ້າວພັດທະນາໜຶ່ງອີກຂອງໂຄງການທີ່ມີມູນຄ່າ 379 ຕື້ໂດລາສະຫະລັດ ຊຶ່ງເປັນໂຄງການໃຫຍ່ສຸດຂອງທຳນຽບຫ້າແຈ (ກະຊວງປ້ອງກັນປະເທດ ສ ອາເມຣິກາ).
ບັນດາເຈົ້າໜ້າທີ່ໃຫ້ຮູ້ວ່າ ເຮືອບິນສູ້ຮົບ F-35 ຈະເຮັດໃຫ້ກອງທັບ ສ ອາເມຣິກາ ມີຄວາມສາມາດກວດຫາເຮືອບິນຂອງຝ່າຍກົງກັນຂ້າມ ແລະ ໄພຄຸກຄາມອື່ນໆໄດ້ຫຼາຍກວ່າທີ່ມີຢູ່ໃນປັດຈຸບັນ ເຮັດໃຫ້ເຮືອບິນໂຈມຕີເປົ້າໝາຍ ແລະ ຫາຍຕົວໄປໃນເວລາທີ່ຖືກກວດພົບ.
ຫ້ອງການຮັບຜິດຊອບໂຄງການ F-35 ຂອງທຳນຽບຫ້າແຈ ໃຫ້ຮູ້ເມື່ອວັນທີ 1 ສິງຫາທີ່ຜ່ານມາວ່າ ເຮືອບິນ F-35A ໄດ້ຍິງລູກສອນໄຟ AIM-9X ຈາກໜ້າດິນສູ່ອາກາດໜ່ວຍໜຶ່ງ ແລະ ໄດ້ກຳຈັດເປົ້າໝາຍຈຳລອງທີ່ເປັນເຮືອບິນແບບບໍ່ມີຄົນຂັບ ຢູ່ໃນສະໜາມທົດລອງແຫ່ງໜຶ່ງ ຢູ່ນອກຝັ່ງທະເລໃນລັດ ຄາລີຟໍເນຍ ເມື່ອວັນທີ 28 ກໍລະກົດທີ່ຜ່ານມາ ປັດຈຸບັນນີ້ ກອງທັບອາກາດ ສ ອາເມຣິກາ ມີແຜນການຈັດຊື້ເຮືອບິນ F-35A ລວມແລ້ວ ມີຈຳນວນ 1.763 ລຳ ກາຍເປັນປະເທດທີ່ຄອບຄອງເຮືອບິນປະເພດນີ້ຫຼາຍສຸດໃນໂລກ.
ກ່ອນໜ້ານັ້ນ ກອງກຳລັງສະເທືອນນ້ຳສະເທືອນບົກ ສ ອາເມຣິກາ ກໍ່ໄດ້ຖະແຫຼງວ່າ ຝູງບິນ F-35 ທຳອິດຂອງກອງກຳລັງນີ້ ໄດ້ມີຄວາມພ້ອມໃນການສູ້ຮົບມາແລ້ວ ເມື່ອເດືອນກໍລະກົດທີ່ຜ່ານມາ.
ທີ່ມາ Pathedlao lao
