ກອງປະຊຸມຄົບຄະນະບໍລິຫານງານສະຫະພັນບານເຕະແຫ່ງຊາດລາວ (ສຕລ) ຄັ້ງທີ 3 ສົກປີ 2015-2019 ຈັດຂຶ້ນວັນທີ 3 ກັນຍາ 2016 ທີ່ໂຮງແຮມເມີກຽວ ໂດຍມີທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກີລາ (ສສກ) ທັງເປັນຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງ ສສກ ທ່ານ ປະສາດໄຊ ພິລາພັນເດຊ ຮັກສາການປະທານສະຫະພັນບານເຕະແຫ່ງຊາດລາວ ແລະ ທ່ານ ສີຊອງມັນ ຫົວໜ້າພະແນກພົວພັນຕ່າງປະເທດ ສະຫະພັນບານເຕະອາຊີ ຮ່ວມສັງເກດການ ພ້ອມດ້ວຍຄະນະບໍລິຫານງານສະຫະພັນກິລາດັ່ງກ່າວ ຕະຫຼອດຮອດສື່ມວນຊົນທຸກຂະແໜງການເຂົ້າຮ່ວມ.
ທ່ານ ປະສາດໄຊ ພິລາພັນເດຊ ກ່າວວ່າ: ໄລຍະຜ່ານມາ ຄະນະບໍລິຫານງານ ສຕລ ໄດ້ສຸມໃສ່ຕັ້ງໜ້າຈັດຕັ້ງປະຕິບັດໜ້າທີ່ຂອງຕົນຢ່າງມີຄວາມ ຮັບຜິດຊອບສູງ ເສຍສະຫຼະເຫື່ອແຮງທັງກາຍ ແລະ ຈິດໃຈ ປະກອບສ່ວນຈົນໄດ້ຮັບຜົນສຳເລັດຫຼາຍໜ້າວຽກ ເປັນຕົ້ນແມ່ນດ້ານວຽກງານການເມືອງ-ແນວຄິດ ວຽກງານການພັດທະນາ ວຽກງານການຈັດການແຂ່ງຂັນ ວຽກງານພື້ນຖານໂຄງລ່າງ-ການບໍລິຫານ ວຽກງານການຕະຫຼາດ-ສື່ມວນຊົນ ວຽກງານການພົວພັນຕ່າງປະເທດ ແລະ ວຽກງານການເງິນ ໂດຍສະເພາະແມ່ນເສີມສ້າງໃຫ້ລາຍການ ລາວ ພຣີເມຍ ລີກ ກ້າວສູ່ການເປັນລະດັບອາຊີບໃນອະນາຄົດ.
ທ່ານ ໄຊບັນດິດ ຣາຊະພົນ ເລຂາທິການ ສຕລ ກໍ່ຍັງໄດ້ມີການລາຍງານແຜນວຽກງານການພັດທະນາ ວຽກງານການຈັດການແຂ່ງຂັນ ວຽກງານກຳມະການຕັດສິນ ວຽກງານສະໜາມເຝິກຊ້ອມ-ສະໜາມແຂ່ງຂັນ ວຽກງານການຕະຫຼາດ-ສື່ມວນຊົນ ວຽກງານບໍລິຫານ ວຽກງານພົວພັນຕ່າງໆປະເທດ ວຽກງານການເງິນ ແລະ ສະເໜີແຜນການປັບປຸງ-ດັດແກ້ກົດລະລະບຽບຂອງ ສຕລ.
ແຫລ່ງຂ່າວໄດ້ມາຈາກ : http://www.vientianemai.net
