ກຳປູເຈຍ ສ້າງຕຶກແຝດ 133 ຊັ້ນ “ສູງທີ່ສຸດໃນໂລກ” ໃນພະນົມເປັນ ມູນຄ່າ 22,1 ພັນຕື້ກີບ

ເວັບໄຊ້ຂ່າວໄຊນ່າເດລີ່ຂອງຈີນ ລາຍງານຈາກກຸງປັກກິ່ງ ເມື່ອວັນທີ 4 ມັງກອນວ່າ ກຸ່ມທຸລະກິດຮ່ວມທຶນຂອງ 2 ບໍລິສັດ ຈີນ ຊິໂນ ເກຣທ ວອລ ອິນເຕີເນຊັ່ນແນລ ແລະ ອູ໋ຊາງ ຊິປບິລດິ້ງ ອິນດັສຕຣີ ຊະນະການປະມູນໂຄງການມູນຄ່າ 2.7 ພັນລ້ານໂດລ່າ (ປະມານ 22,107,590,272,660 ກີບ) ໃນການກໍ່ສ້າງຕຶກແຝດຂະໜາດ 133 ຊັ້ນ, ຄວາມສູງ 560 ແມັດ ໃນກຸງພະນົມເປັນ, ເມືອງຫຼວງຂອງກຳປູເຈຍ, ໂດຍການກໍ່ສ້າງຈະເລີ່ມປະມານກາງປີ 2017 ນີ້ ແລະ ໄດ້ກຳນົດໄລຍະເວລາຕາຍໂຕໃນການກໍ່ສ້າງໄວ້ທີ່ 60 ເດືອນ.

ຖະແຫຼງການຂອງ ຊິໂນ ເກຣທ ວອລ ບໍລິສັດແມ່ຂອງ ຊິໂນ ເກຣທ ວອລ ອິນເຕີເນຊັ່ນແນລ ກ່າວວ່າ ຕຶກແຝດ TBR ນີ້ (Twin Tower World Trade Centre _ TBR Twin Tower) ຈະສ້າງເທິງແຄມຝັ່ງແມ່ນໍ້າຂອງ ໃນແຖບທຸລະກິດການຄ້າຂອງກຸງພະນົມເປັນ, ໂຄງການຈະລວມເຖິງຫ້າງສັບພະສິນຄ້າ, ສຳນັກງານ, ທີ່ພັກອາໄສ, ຫ້ອງຈັດງານ, ໂຮງແຮມ ແລະ ບ່ອນຈອດລົດໃຕ້ດິນຂະໜາດ 4 ຊັ້ນ.

ດ້ວຍຂະໜາດເນື້ອທີ່ກວ່າ 1.5 ລ້ານຕາລາງແມັດ ຈະເຮັດໃຫ້ຕຶກແຝດແຫ່ງໃໝ່ ໃນພະນົມເປັນ ກາຍເປັນສູນການຄ້າໂລກ ຂະໜາດໃຫຍ່ທີ່ສຸດໃນອາຊີຕາເວັນອອກສ່ຽງໃຕ້.

ຕຶກແຝດທີ່ສູງທີ່ສຸດໃນໂລກ ໃນປະຈຸບັນແມ່ນ ເປໂຕຣນາສ ທາວເວີ້ ໃນກຸງກົວລາລຳເປີ, ເມືອງຫຼວງຂອງມາເລເຊຍ ທີ່ມີຄວາມສູງ 451.9 ແມັດ, ຂະໜາດ 88 ຊັ້ນ.  ສ່ວນຕຶກດ່ຽວ ທີ່ສູງທີ່ສຸດໃນໂລກໃນຂະນະນີ້ແມ່ນ ຕຶກເບີຈ໌ ຄໍລິຟາ ໃນເມືອງດູໄບ ປະເທດສະຫະລັດອາຫຼັບເອມິເຣຕສ໌ (UAE) ເຊິ່ງສູງ 829.8 ແມັດ.

ຂອບໃຈແຫຼ່ງຂ່າວຈາກ: ເວັບໄຊ້ຂ່າວໄຊນ່າເດລີ່ ແລະ http://www.devcrown.com/%E0%BA%81%E0%BA%B3%E0%BA%9B%E0%BA%B9%E0%BB%80%E0%BA%88%E0%BA%8D-%E0%BA%AA%E0%BB%89%E0%BA%B2%E0%BA%87%E0%BA%95%E0%BA%B6%E0%BA%81%E0%BB%81%E0%BA%9D%E0%BA%94-133-%E0%BA%8A%E0%BA%B1%E0%BB%89%E0%BA%99/