ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກີລາ ໄດ້ໃຫ້ກຽດຕ້ອນຮັບການເຂົ້າຢ້ຽມຄໍານັບຂອງທ່ານ ນາງ YAN Qipeng ຮອງອໍານວຍການ ມະຫາວິທະຍາໄລ ຊີ່ໜານ ຈ່ຽວທົ່ງ ສປ ຈີນ ພ້ອມດ້ວຍຄະນະ ໃນວັນທີ 19 ເມສາ 2017 ທີ່ກະຊວງສຶກສາທິການ ແລະ ກີລາ ໂອກາດມາຢ້ຽມຢາມ ແລະ ຮ່ວມປຶກສາຫາລືກ່ຽວກັບແຜນການຮ່ວມມືຕໍ່ໜ້າດ້ານການຄົມມະນາຄົມໃນຂົງເຂດການສຶກສາ ລະຫວ່າງວັນທີ 19-23 ເມສາ 2017 ນີ້ ຮ່ວມກັບພາກສ່ວນກ່ຽວຂ້ອງ.
ທ່ານລັດຖະມົນຕີ ກະຊວງສຶກສາທິການ ແລະ ກີລາ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການເດີນທາງມາເຄື່ອນໄຫວເຮັດວຽກຂອງຄະນະຜູ້ແທນມະຫາວິທະຍາໄລ ຊີ່ໜານ ຈ່ຽວທົ່ງ ສປ ຈີນ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເພື່ອເສີມສ້າງຄວາມເຂົ້າໃຈ ແລະ ຮ່ວມມືດ້ານວຽກງານການສຶກສາ ລະຫວ່າງ ມະຫາວິທະຍາໄລຂອງ ສປປ ລາວ ແລະ ມະຫາມະຫາວິທະຍາໄລ ຊີ່ໜານ ຈ່ຽວທົ່ງ ສປ ຈີນ ໃຫ້ນັບມື້ໜັກແໜ້ນ-ເຂັ້ມແຂງຍິ່ງຂຶ້ນ ພ້ອມນີ້ທ່ານລັດຖະມົນຕີສະເໜີຕໍ່ຄະນະ ຈັດເຝິກອົບຮົມເຕັກນິກເສັ້ນທາງລົດໄຟ ແລະ ດ້ານວິທະຍາສາດ ໃຫ້ແກ່ມະຫາວິທະຍາໄລຂອງລາວ ເພື່ອຍົກສູງຂີດຄວາມສາມາດວຽກງານສຶກສາ ໃຫ້ມີຄວາມເຂັ້ມແຂງ ແລະ ຮອບດ້ານ ພ້ອມນໍາຜົນປະໂຫຍດສູງສຸດ ແກ່ພັກ-ລັດຖະບານ ແລະ ປະຊາຊົນສອງຊາດລາວ-ຈີນໃຫ້ນັບມື້ດີຂຶ້ນ.
ໂອກາດນີ້ ທ່ານຮອງອໍານວຍການ ມະຫາວິທະຍາໄລ ຊີ່ໜານ ຈ່ຽວທົ່ງ ສປ ຈີນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງລາຍງານຈຸດປະສົງ ທີ່ຈະມີການຮ່ວມມືກັບພາກສ່ວນກ່ຽວ ຂ້ອງໃຫ້ຊາບ ພ້ອມນີ້ທ່ານຮອງອໍານວຍການ ຢືນຢັ້ນຈະສືບຮ່ວມມື ແລະ ຜັນຂະ ຫຍາຍສາຍພົວພັນ ຮ່ວມມືກັບ ພັກ - ັລັດຖະບານລາວ ເປັນຕົ້ນແມ່ນແຜນການຮ່ວມມືຕໍ່ໜ້າດ້ານການຄົມມະນາຄົມໃນຂົງເຂດການສຶກສາ ໃຫ້ມີຄວາມແຂັ້ມແຂງຮອບດ້ານ ເພື່ອຜົນປະໂຫຍດສູງສຸດຂອງຊາດໃນຍຸກການເຂົ້າຮ່ວມເປັນປະຊາຄົມເສດຖະກິດອາຊຽນໃນປັດຈຸບັນຕື່ມອີກ.
ທີ່ມາ
