ກຸ່ມໂຕນອາບູໄຊຍາບ ທາງພາກໃຕ້ຂອງຟີລິບປິນ ຂ້າຕັດຫົວຕົວປະກັນລູກເຮືອສິນຄ້າຊາວຫວຽດນາມ 2 ຄົນ ທີ່ປຸ້ນເຮືອ ແລະ ລັກພາຕົວໄປຮຽກຄ່າໄຖ່ເມື່ອ 8 ເດືອນກ່ອນ.
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 5 ກໍລະກົດນີ້ວ່າ: ເຈົ້າໜ້າທີ່ຟີລິບປິນໄດ້ຮັບແຈ້ງຈາກປະຊາຊົນວ່າ: ພົບສົບ 2 ລູກເຮືອສິນຄ້າຊາວຫວຽດນາມ ຖືກຖິ້ມຢູ່ປ່າໃກ້ບ້ານແຫ່ງໜຶ່ງໃນເມືອງຊູມິຊິບ ເກາະບາສິລັນ ທາງພາກໃຕ້. ຈາກການກວດສອບຈຸດເກີດເຫດ ເຈົ້າໜ້າທີ່ພົບຮ່າງຂອງຜູ້ເຄາະຮ້າຍທັງສອງໃນສະພາບຫົວຖືກຕັດຂາດຈາກລຳຕົວທັງສອງ ແລະ ຫົວວາງຢູ່ຂ້າງລຳຕົວ ໂດຍເຈົ້າໜ້າທີ່ພົບສົບເມື່ອເວລາປະມານ 7:00 ໂມງ ເຊົ້າວັນທີ 4 ກໍລະກົດ.
ຜູ້ເສຍຊີວິດທັງສອງເປັນສ່ວນໜຶ່ງຂອງລູກເຮືອຊາວຫວຽດນາມ 6 ຄົນ ຂອງເຮືອສິນຄ້າ ເອັມວີ ຣໍຍັດ 16 ຂອງຫວຽດນາມ ທີ່ຖືກກຸ່ມໂຈນອາບູໄຊຍາບປຸ້ນ ແລະ ຄວບຄຸມຕົວໄປໃນເດືອນພະຈິກປີຜ່ານມາ, ຂະນະທີ່ເຮືອຂີ່ຜ່ານທະເລນອກແຄມຝັ່ງເກາະບາສິລັນ ແລະ ລູກເຮືອຄົນໜຶ່ງໃນກຸ່ມໄດ້ຮັບການຊ່ວຍເຫລືອເປັນອິດສະລະ ຈາກປະຕິບັດການຂອງທະຫານຟີລິບປິນ ໃນເດືອນມິຖຸນາຜ່ານມາ.
ລູກເຮືອຊາວຫວຽດນາມອີກ 3 ຄົນຍັງຢູ່ນຳກຸ່ມອາບູໄຊຍາບ ຮ່ວມກັບຕົວປະກັນທັງໝົດ 22 ຄົນ ເຊິ່ງເປັນຄົນຕ່າງປະເທດ 14 ຄົນ ແລະ ຄົນຟີລິບປິນ 8 ຄົນ. ອາບູໄຊຍາບ ເຊິ່ງມີຖານທັບຢູ່ເກາະໂຈໂລ ແລະ ເກາະບາສິລັນ ມັກຂ້າຕັດຫົວຕົວປະກັນ ເມື່ອບໍ່ໄດ້ຮັບເງິນຄ່າໄຖ່ຕາມຮຽກຮ້ອງ. ເດືອນກຸມພາຜ່ານມາ, ທ່ານ ເຈີເກນ ຄານເນີ ຕົວປະກັນຄົນເຢຍລະມັນ ອາຍຸ 70 ປີ ຖືກກຸ່ມອາບູໄຊຍາບຂ້າຕັດຫົວ ເມື່ອບໍ່ໄດ້ເງິນຄ່າໄຖ່ທີ່ຮຽກຮ້ອງຈຳນວນ 30 ລ້ານເປໂຊ (ປະມານ 4.896 ລ້ານກີບ).
ທາງດ້ານຄວາມຄືບໜ້າປະຕິບັດການຂອງກອງກຳລັງຄວາມໝັ້ນຄົງຟີລິບປິນ ກວາດລ້າງກຸ່ມກະບົດເມົາເຕ ທີ່ບຸກຍຶດເມືອງມາລາວີ ເກາະມິນດາເນົາ ທາງພາກໃຕ້ ແຕ່ວັນທີ 23 ພຶດສະພາ. ຫລ້າສຸດເຈົ້າໜ້າທີ່ກອງທັບເປີດເຜີຍໃນວັນທີ 5 ກໍລະກົດວ່າ: ການສູ້ຮົບເປັນເວລາ 6 ອາທິດ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 460 ຄົນ ປະກອບມີນັກຮົບກະບົດຢ່າງໜ້ອຍ 336 ຄົນ, ທະຫານ ແລະ ຕຳຫລວດ 85 ຄົນ ແລະ ພົນລະເຮືອນ 39 ຄົນ.
ວີດີໂອຂ່າວ
CR ລາວພັດທະນາ
