![](https://blogger.googleusercontent.com/img/b/R29vZ2xl/AVvXsEgz31UaII3X3HWPrr1ZgLqxCTViSTbFAOZYUu5D_kp6IIUkwA2_EQ2mpQr7_OPC_41rS13G7Ya_Bn4p2iMcO2Ntji16n70vB4vTyHjHvljCWqXF4Nac7e4Y1gRZVEoAULojNBfrJmgtllZS/s1600/template_bknews.png)
ໃກ້ເຂົ້ານັບມື້ແລ້ວ! ສໍາລັບງານບຸນນະມັດສະການພະທາດຫຼວງວຽງຈັນ ເຊິ່ງຖືໄດ້ວ່າເປັນງານບຸນປະເພນີທີ່ສໍາຄັນ ແລະ ຍິ່ງໃຫຍ່ ທັງເປັນສູນກາງເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າຈາກທຸກສາລະທິດມາສ້າງບຸນກຸສົນຮ່ວມກັນ. ເຊິ່ງງານບຸນພະທາດຫຼວງນີ້ຈະໄດ້ຈັດຂຶ້ນ ໃນທຸກໆປີຂອງມື້ເພັງ ຂຶ້ນ 15 ຄໍ່າເດືອນ 12 ລາວ ໂດຍຈະມີການຈັດງານສະເຫຼີມສະຫຼອງປະມານ 7-10 ມື້. ສຳລັບປີນີ້ ແມ່ນກົງກັບວັນ ພະຫັດ ວັນທີ 22 ພະຈິກ 2018.
![](https://blogger.googleusercontent.com/img/b/R29vZ2xl/AVvXsEiDz7ZiBWQGUtNaj117jAe33nzLnj3Fy0_P9HyGZo1hp22Xy4Fx0bLATPQ6dH5K8gWKmmvGdN9dRB5F7NZ6dnl3OhRUT3GTbTFIyqndzqkzxcbhQBoZKxI-GcHt3873PWx2Dz5Wx6ZWGvvn/s1600/15095065_686583974838690_6297840374879965239_n.jpg)
ເຊິ່ງໃນແຕ່ລະປີຜ່ານມາ ກໍຈະມີການຈັດງານວາງສະແດງ ແລະ ຂາຍສິນຄ້າປະເພດຕ່າງໆຈາກພາກລັດ, ບໍລິສັດ, ຫ້າງຮ້ານ ແລະ ອົງການຈັດຕັ້ງສາກົນຕ່າງໆປະຈໍາລາວເປັນຈຳນວນຫຼວງຫຼາຍ. ນອກນັ້ນ, ກໍຈະມີການຄົບງັນຕາມພິທີທາງສາສະໜາ ໂດຍສະເພາະແມ່ນການແຫ່ຜາສາດເຜິ້ງຈາກວັດສີເມືອງ ຫາພະທາດຫຼວງດ້ວຍບັນຍາກາດຄຶກຄື້ນ ແລະ ມ່ວນຊື່ນ. ນອກນັ້ນ, ກໍຈະມີກິດຈະກໍາຕີຄີທີ່ເດີ່ນພະທາດຫຼວງຕາມທີ່ເຄີຍປະຕິບັດກັນມາ ແລະ ມີພິທີໃສ່ບາດຢາດນໍ້າທີ່ເດີ່ນພະທາດຫຼວງ ເພື່ອອຸທິດສ່ວນບຸນສ່ວນກຸສົນ ແລະ ຮ່ວມຖວາຍປັດໄຈໄຊຍະທານຕ່າງໆ ເຂົ້າໃນການບູລະນະສ້າງສາພະທາດຫຼວງວຽງຈັນ ແລະ ວັດວາອາຮາມປູສະນິຍະສະຖານຕ່າງໆ.
![](https://blogger.googleusercontent.com/img/b/R29vZ2xl/AVvXsEgh6yZfYgTO9cS8uQxoM94b89v4SyoJmBRTCrypGKJzn1zGhURraizGOWnFeLiNWQ4T4qt52EWFxJRMOHuCZ3dfz-3xFyJ-uXO2qaxsGbWwSB9KHHgqBmMTLSuRjKb9Yl9CZTA80UDtwVP0/s1600/22730274_1491649327537726_5889122839578555634_n.jpg)
ສຳລັບໃນປີ 2018 ນີ້ ງານສະເຫຼີມສະຫຼອງບຸນນະມັດສະການພະທາດຫຼວງ ຈະພິເສດ ແລະ ແຕກຕ່າງຈາກປີຜ່ານໆມາ ເນື່ອງຈາກວ່າກິດຈະກຳໃນປີນີ້ ຈະມີຖະໜົນໂຄມໄຟ, ຖະໜົນປອດລົດ, ງານສິລະປະ ແລະ ງານສີມື, ຍ່າງຊົມ ພ້ອມຖ່າຍຮູບກັບໂຄມໄຟ, ອາຫານລາວເດີມ ແລະ ການນຸ່ງຖືແບບປະເພນີລາວ ເຊິ່ງຈະເລີ່ມນັບແຕ່ວັນທີ 16-22 ພະຈິກ 2018 ນີ້.
![](https://blogger.googleusercontent.com/img/b/R29vZ2xl/AVvXsEh-zchN-Cmz3gC3IOyiirN8GEl4RYuQgWmwTpHg_i4xXgJ37EoyfECJHT6OHlvDtlIDFN6XQRaIV93BOF8Sh5I-eMnIUnw8Hsdqz0ZNp2ASWxKHk3ZDNFuIEswOHGEADxYnoFH8ZED5CyMC/s1600/2.jpg)
![](https://blogger.googleusercontent.com/img/b/R29vZ2xl/AVvXsEhj074n0alfD4xmNeZ_WAkcPhqc3XMQQXwYaVP2EJS-Qo0l1xpY-_6a3GsfZWYumpUYhHYSDdBXAOmYeAw1dWqnUuAcjuHr10UOOnr-tmaeg5N3QGknvUcO4F0BfjFY2CYPXP6-ukGaCOED/s1600/22730274_1491649327537726_5889122839578555634_n.jpg)
![](https://blogger.googleusercontent.com/img/b/R29vZ2xl/AVvXsEjYa1Kq0W7p7k4Db6gu8ylYWJaV5tXkTZMNQQ5EFoza4mMh9AJVE1t7RuJfM8tLafLzbPcsOv5f-9fh3mZnbe18O19xoN0mUEhc0H_-z5dYXhwOpd9OunhHXHqqp5T2t5EZWWmXIo2LW1yU/s1600/26991616_2017045138576451_2896881093684445118_n.jpg)
![](https://blogger.googleusercontent.com/img/b/R29vZ2xl/AVvXsEj58liQoCSnFTMOwlxMM9v4kFHvZ7aDgjQZEho9RjXA99Q9f5kmyNLRpg7zr2tckPwijan3AtDa6K-3qGLw5PgGveMDOcZ5QJ0avwyKdT7wGJwkrgkuNDAyhu6VTNuVRjW-3inR2K_vK54D/s1600/b7b16dab29467882b63ddb715e060627.jpg)
![](https://blogger.googleusercontent.com/img/b/R29vZ2xl/AVvXsEhAVi0_28m_eG6DVqNCnfl20WSLB9c975EkcWRQa0_o4zE4izawndUGRqsfKnm5EJyQ-kZZkM9JwM3pCdGpGbkaLBT7lRMC-I12YCQSL0lnearRg1RV-o1fLPtCL1QCx4OBjzPEJeAyP0sj/s1600/45443435_1991856070907643_7888754015259852800_n.jpg)
ຂໍຂອບໃຈທີ່ມາ: laoedaily.com.la