ຂປລ.ລັດຖະບານ ຈີນ ໄດ້ນຳເອົາອຸປະກອນການແພດ ປະກອບມີ ໜ້າກາກອະນາໄມທົ່ວໄປ ຈຳນວນ 4 ແສນອັນ, ໜ້າກາກອະນາໄມ N95 ຈຳນວນ 5 ພັນອັນ ແລະ ເສື້ອຊຸດປ້ອງກັນໂຕເອງ ຈຳນວນ 5 ພັນອັນ ລວມມູນຄ່າ 3 ແສນກວ່າໂດລາສະຫະລັດ ມາມອບໃຫ້ແກ່ລັດຖະບານລາວ ໃນວັນທີ 30 ມີນາ 2020 ທີ່ສາງພະລາທິການ ການແພດ ເຂດດົງໂພສີ ນະຄອນຫລວງວຽງຈັນ ເພື່ອຕ້ານການແຜ່ລະບາດ ຂອງເຊື້ອໄວຣັດໂຄວິດ-19 ຢູ່ ສປປ ລາວ ບໍ່ໃຫ້ເພີ່ມຂຶ້ນ ແລະ ຫລຸດລົງໂດຍໄວ.
ພ້ອມດຽວກັນນັ້ນ ມູນນິທິ ແຈັກມາ ກໍໄດ້ນຳເອົານໍ້າຢາກວດຫາເຊື້ອໂຄວິດ-19 ຈຳນວນ 20ພັນກວ່າຊຸດ, ລວມມູນຄ່າ 129,011.52 ໂດລາສະຫະລັດ ມາມອບໃຫ້ລັດຖະບານລາວ ເຊັ່ນດຽວກັນຕາງໜ້າ ລັດຖະບານ ຈີນ ມອບໂດຍທ່ານ ວາງຊີຮຸ່ຍ ທູດທີ່ປຶກສາເສດຖະກິດ-ການຄ້າ ສປ ຈີນ ປະຈຳລາວ ແລະ ຮັບໂດຍ ທ່ານ ບຸນແຝງ ພູມມະໄລສິດ ຮອງລັດຖະມົນຕີ ກະຊວງສາທາລະນະສຸກ.
ໂອກາດດັ່ງກ່າວ, ທ່ານ ບຸນແຝງ ພູມມະໄລສິດ ໄດ້ສະແດງຄວາມຄອບໃຈ ແລະ ຕີລາຄາສູງຕໍ່ລັດຖະບານຈີນ ທີ່ໄດ້ນຳເອົາອຸປະກອນການແພດ ມາມອບໃຫ້ ລັດຖະບານ ລາວ ໃນຄັ້ງນີ້, ພ້ອມທັງ ຢືນຢັນ ຈະນຳເອົາອຸປະກອນດັ່ງກ່າວ ໄປນຳໃຊ້ໃຫ້ເກີດຜົນປະໂຫຍດສູງສຸດ ເຊິ່ງຈະນຳໄປແຈກຢາຍ ໃຫ້ຂະແໜງການທີ່ກ່ຽວຂ້ອງ ທີ່ເຮັດວຽກກ່ຽວກັບການຕ້ານ ແລະ ຄອບຄຸມ ການແຜ່ລະບາດຂອງໄວຣັດໂຄວິດ-19 ໃນຂອບເຂດທົ່ວປະເທດ ແນໃສ່ຄວບຄຸມ ການແຜ່ລະບາດຂອງພະຍາດນີ້ ຢູ່ ສປປ ລາວ ໃຫ້ຫລຸດລົງໂດຍໄວ.
ຂ່າວ: ທະນູທອງ ຮູບ: ຂັນໄຊ
ຂ່າວ: ທະນູທອງ ຮູບ: ຂັນໄຊ
