ຂປລ. ແຂວງສາລະວັນ ຈະເປີດກອງປະຊຸມສະພາປະຊາຊົນ ເຂດ 14 ຄັ້ງປະຖົມມະລຶກ ໃນວັນທີ 29-30 ມິຖຸນາ 2016 ນີ້, ເຊິ່ງກອງປະຊຸມດັ່ງກ່າວ ແມ່ນເຫດການທີ່ສຳຄັນທາງດ້ານປະຫວັດສາດ, ມີຄວາມໝາຍທາງດ້ານການເມືອງຢ່າງໜັກແໜ້ນ ຢັ້ງຢືນເຖິງຄວາມເປັນເອກະພາບ ແລະ ຄວາມ ເຊື່ອໜັ້ນ ຂອງປວງຊົນຊາວແຂວງສາລະວັນ.
ທ່ານ ຄຳເຫລັກ ອິນດາວົງ ກຳມະການພັກແຂວງ ປະທານສະຫະພັນກຳມະບານແຂວງ ຄະນະຮັບຜິດຊອບກະກຽມ ກອງປະຊຸມຄັ້ງປະຖົມມະລຶກ ຂອງສະພາປະຊາຊົນ ເຂດ 14 ໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 27 ມິຖຸນາ ນີ້ ວ່າ: ກອງປະຊຸມຈະໄດ້ຮັບຮອງເອົາ ແລະ ພິຈະລະນາ ຫລາຍບັນຫາ ທີ່ສຳຄັນຕ່າງໆ ໂດຍມີ 11 ຫົວຂໍ້ໃຫຍ່ ຮັບຟັງການລາຍງານ ຈາກຄະນະກຳມະການເລືອກຕັ້ງ ຂັ້ນແຂວງກ່ຽວກັບຜົນ ການເລືອກຕັ້ງ ແລະ ຢັ້ງຢືນຄຸນລັກສະນະຂອງສສຂ, ຈະໄດ້ເລືອກຕັ້ງເອົາ ປະທານສະພາປະຊາຊົນແຂວງ ແລະ ຮອງປະທານສະພາແຂວງ, ພິຈາລະນາ ໂຄງປະກອບຕ່າງໆ ຂອງສະພາປະຊາຊົນແຂວງສາລະວັນ, ພິຈາລະນາຮັບຮອງເອົາແຜນຍຸດທະສາດ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ແຫ່ງລັດ 5 ປີຂອງແຂວງ, ແຜນການ 5 ປີກ່ຽວກັບການດຳເນີນງານຂອງສະພາປະຊາຊົນແຂວງ ແລະ ບັນຫາສຳຄັນພື້ນຖານ ຂອງແຂວງ.
ພ້ອມນີ້, ກອງປະຊຸມຈະໄດ້ເປີດໂອກາດໃຫ້ຄະນະພັກທຸກຂັ້ນ, ອຳນາດການປົກຄອງຕະຫລອດເຖິງພໍ່ແມ່ປະຊາຊົນບັນດາເຜົ່າ ໄດ້ສະແດງຄວາມຄິດເຫັນ ຜ່ານລະບົບໂທລະສັບສາຍດ່ວນ ຂອງຫ້ອງວ່າການສະພາ ເຂດ 14 ໄດ້ຕື່ມຕາມໝາຍເລກ 034 211 024 ໃນໂມງລັດຖະການ.
ທີ່ມາແຫຼ່ງຂ່າວ: ສຳນັກຂ່າວສານປະເທດລາວ
