ເວົ້າເຖິງເລື່ອງພະຍາດໄສ້ຕິ່ງອັກເສບ ຫຼາຍຄົນອາດຈະເຄີຍຄຸ້ນຫູກັບຊື່ພະຍາດຊະນິດນີ້ກັນມາແດ່ແລ້ວ ມື້ນີ້ເຮົາຂໍນຳຄວາມຮູ້ດີໆ ກ່ຽວກັບພະຍາດໄສ້ຕິ່ງອັກເສບມາຝາກ ຈະເປັນແນວໃດດ້ວຍນັ້ນຕ້ອງໄປຕິດຕາມອ່ານພ້ອມໆ ກັນເລີຍ
ສາເຫດຂອງການເກີດໄສ້ຕິ່ງອັກເສບ
ພະຍາດໄສ້ຕິ່ງອັກເສບເກີດຈາກການອຸດຕັນຂອງໄສ້ຕິ່ງຈາກອຸດຈາລະທີ່ແຂງໂຕ ໂດຍມີສິ່ງແປກປອມ ພະຍາດ ຫລື ກ້ອນເນື້ອງອກ ໄປເຮັດໃຫ້ເກີດການອຸດຕັນ ຈົນເກີດການອັກເສບຂຶ້ນມາ
ອາການຂອງພະຍາດໄສ້ຕິ່ງອັກເສບ
ສຳລັບອາການຂອງພະຍາດໄສ້ຕິ່ງອັກເສບໂດຍສ່ວນໃຫຍ່ນັ້ນຈະມີອາການເຈັບທ້ອງ ແຕ່ບໍ່ສາມາດບອກຕຳແໜ່ງທີ່ເຈັບໄດ້ແບບຊັດເຈນ ເນື່ອງຈາກບາງເທື່ອອາດເຈັບອ້ອມສະບືກ່ອນ ມີອາການເຈັບເປັນໄລຍະໆ ຫລື ຕະຫລອດເວລາກໍໄດ້ ແຕ່ໂດຍສ່ວນໃຫຍ່ແລ້ວມັກເຈັບຕະຫລອດເວລາ ຫຼັງຈາກນັ້ນ ອາການເຈັບຈະເລີ່ມຍ້າຍໄປໃນບໍລິເວນທ້ອງນ້ອຍເບື້ງຂວາ ເຊິ່ງເວລານີ້ຜູ້ປ່ວຍອາດມີໄຂ້ຕ່ຳໆ ລວມຢູ່ນໍາ ສຳລັບຜູ້ປ່ວຍບາງຄົນອາດມີອາການບໍ່ຄືດັ່ງທີ່ເຮົາກ່າວມາເບື້ງຕົ້ນ ເພາະຂຶ້ນຢູ່ກັບຕຳແໜ່ງຂອງໄສ້ຕິ່ງຊັ່ນ: ຜູ້ປ່ວຍອາດມີອາການເຈັບທາງດ້ານຂວາດ້ານເທິງ ຫລື ສູນກາງກໍເປັນໄປໄດ້ ຫາກປາຍຂອງໄສ້ຕິ່ງຍາວໄປເຖິງບໍລິເວນນັ້ນ
ການປິ່ນປົວພະຍາດໄສ້ຕິ່ງອັກເສບ
ການປິ່ນປົວພະຍາດໄສ້ຕິ່ງອັກເສບ ບໍ່ວ່າໄສ້ຕິ່ງຈະແຕກ ຫລື ບໍ່ກໍຕາມ ກໍສາມາດເລີ່ມການຮັກສາໄດ້ດ້ວຍການຜ່າຕັດ ສຳລັບໃນຜູ້ປ່ວຍທີ່ໄສ້ຕິ່ງແຕກ ແພດຈະຕ້ອງໃຫ້ຢາປະຕິຊີວະນະຊ່ວຍ ທັງນີ້ຫາກຜູ້ປ່ວຍບໍ່ໄດ້ຮັບການຮັກສາທີ່ຖືກຕ້ອງຢ່າງທັນທ່ວງທີ ກໍອາດເກີດພະຍາດແຊກຊ້ອນໄດ້ເຊັ່ນ: ໄສ້ຕິ່ງກາຍເປັນຝີໃນທ້ອງ ຫລື ໄສ້ຕິ່ງແຕກມີໜອງອອກມາພາຍໃນບໍລິເວນທ້ອງ ຊຶ່ງອາດເຮັດໃຫ້ຜູ້ປ່ວຍເສຍຊີວິດໄດ້
ຂໍ້ຄວນຮູ້! ກ່ຽວກັບພະຍາດໄສ້ຕິ່ງອັກເສບ
ໃນກໍລະນີທີ່ຜູ້ປ່ວຍມີອາການເຈັບທ້ອງເລີ່ມຕົ້ນ ແຕ່ບໍ່ຮູ້ເຖິງສາເຫດຂອງອາການປວດທີ່ສະແດງອອກມາ ບໍ່ຄວນກິນຢາແກ້ປວດເຂົ້າໄປ ແຕ່ແນະນຳໃຫ້ຮີບໄປພົບແພດເພື່ອເລີ່ມການກວດພິຈາລະນາພະຍາດເສຍກ່ອນ ເພາະຫາກຜູ້ປ່ວຍກິນຢາແກ້ປວດເຂົ້າໄປ ຈະເຮັດໃຫ້ແພດພິຈາລະນາພະຍາດໄດ້ຍາກ ເນື່ອງຈາກຢາແກ້ປວດທີ່ຜູ້ປ່ວຍກິນເຂົ້າໄປນັ້ນຈະໄປປິດບັງອາການຂອງພະຍາດ ໂດຍສະເພາະໃນຊ່ວງທີ່ຜູ້ປ່ວຍເຈັບທ້ອງຫລາຍຕິດຕໍ່ກັນດົນເປັນເວລາຫລາຍກວ່າ 6 ຊົ່ວໂມງ ຍາດພີ່ນ້ອງ ຫລື ຄົນອ້ອມຂ້າງຜູ້ປ່ວຍຄວນຮີບພາຜູ້ປ່ວຍໄປພົບແພດແຕ່ໂດຍໄວ ເພາະໂດຍສ່ວນໃຫຍ່ແລ້ວ ຖ້າມີອາການເຈັບດັ່ງກ່າວແລ້ວບໍ່ໄດ້ເປັນພະຍາດໄສ້ຕິ່ງອັກເສບ ກໍມັກເປັນອາການຮ້າຍແຮງຂອງພະຍາດອື່ນໆ ຢູ່ສະເໝີ
ການຮູ້ທັນພະຍາດໄສ້ຕິ່ງອັກເສບ ນອກຈາກຈະຊ່ວຍໃຫ້ທ່ານລອດພົ້ນຈາກອາການເຈັບປວດ ແລະ ທໍລະມານຂອງພະຍາດແລ້ວ ຍັງຊ່ວຍໃຫ້ທ່ານຮູ້ເຖິງວິທີການເບິ່ງແຍງໂຕເອງທີ່ຖືກຕ້ອງໃນກໍລະນີທີ່ມີອາການເຈັບທ້ອງທີ່ສົງໄສວ່າໜ້າຈະເປັນພະຍາດໄສ້ຕິ່ງອັກເສບ ລວມທັງວິທີການຮັກສາທີ່ບໍ່ກໍ່ໃຫ້ເກີດຜົນເສຍຕາມມາພາຍຫລັງອີກດ້ວຍ
ແຫຼ່ງຂ່າວ ຄິດອອກ.ຄອມ