ທີ່ແຂວງສາລະວັນ: ເນື່ອງໃນໂອກາດວັນອະນຸຮັກສັດນ້ຳ-ສັດປ່າ (13 ກໍລະກົດ) ເມືອງສາລະວັນໄດ້ຈັດພິທີປ່ອຍປາຄືນສູ່ທຳມະຊາດ 1,2 ລ້ານໂຕ ຢູ່ໃນທົ່ວເມືອງສາລະວັນ
ໂດຍສະເພາະໄດ້ປ່ອຍຢູ່ຈຸດກຸ່ມ 2 ແກ້ງຄອງຄຳ, ກຸ່ມ 6 ແສນວັງ, ກຸ່ມ 7 ບຶງຂາມ, ກຸ່ມ 8 ບຶງໃຊ, ກຸ່ມ 10 ບ້ານດ່ານ, ກຸ່ມ 11 ກະຊະໃຫຍ່, ກຸ່ມ 13 ໜອງບົວ ແລະບ້ານທ່າ ເມືອງເຊກຸ່ມເມືອງສາລະວັນ ຊຶ່ງຈຳນວນປາທີ່ນຳມາປ່ອຍປະກອບມີ: ປາປາກ, ປາໄນ, ປານິນ, ປານວນຈັນ ແລະປາເກັດແລບ ພິທີປ່ອຍດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 13 ກໍລະກົດປີຢູ່ທີ່ທ່ານ້ຳເຊໂດນໂດຍການເຂົ້າຮ່ວມຂອງທ່ານ ຄຳຈັນ ແຈ່ມສະໜອນ ຄະນະປະຈຳພັກແຂວງ ປະທານກວດກາພັກ-ລັດແຂວງ, ທ່ານ ທຶງ ຈອມມະນີ ຄະນະປະຈຳພັກແຂວງເລຂາພັກເມືອງ ເຈົ້າເມືອງໆສາລະວັນ, ມີບັນດາທ່ານແຂກຖືກເຊີນຈາກພະແນກການອອ້ມຂ້າງແຂວງ, ຫ້ອງການຕ່າງໆອ້ອມຂ້າງເມືອງ ແລະບ້ານເທສະບານເມືອງສາລະວັນເຂົ້າຮ່ວມ.
ທີ່ແຂວງໄຊຍະບູລີ: ໃນວັນທີ 13 ກໍລະກົດແຂວງໄຊຍະບູລີ ເວົ້າລວມເວົ້າສະເພາະໃນເທສະບານແຂວງ ກໍຄືເມືອງໄຊຍະບູລີກໍໄດ້ຈັດໃຫ້ມີການປ່ອຍ ປາຂຶ້ນຢູ່ທີ່ສາຍນ້ຳຮຸ່ງເທສະບານເມືອງໄຊຍະບູລີ ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ກຳມະການສູນກາງ ພັກເລຂາພັກແຂວງ ເຈົ້າແຂວງໆໄຊຍະບູລີ, ມີບັນດາກຳມະການປະຈຳພັກແຂວງ, ກຳມະການປະຈຳພັກເມືອງ, ຫົວໜ້າພະແນກການ, ກົມກອງ, ນັກທຸລະກິດພະນັກງານຫຼັກແຫຼ່ງອ້ອມຂ້າງແຂວງ, ເມືອງພ້ອມດ້ວຍອຳນາດການປົກຄອງບ້ານ ແລະນ້ອງນັກຮຽນເຂົ້າຮ່ວມ.
ຈຳນວນປາທີ່ມາປ່ອຍຄັ້ງນີ້ລວມທັງໝົດ 685.000 ໂຕ ໃນນີ້ປ່ອຍລົງໜອງຂອງປະຊາຊົນເພື່ອຂາຍເປັນສິນຄ້າ 505 ພັນໂຕ, ປ່ອຍລົງສູ່ສາຍນ້ຳທຳມະຊາດ, ອ່າງໂຕງຊົນລະປະທານ 181 ພັນໂຕ, ມີ 5 ຈຸດຄື: ຈຸດນ້ຳຮຸ່ງໜ້າສະໜາມຫຼວງ, ຈຸດນ້ຳຮຸ່ງເຂດວັງສະຫງວນບ້ານສວນ-ວັງຊອຍ, ຈຸດນ້ຳຮຸ່ງວັງສະຫງວນບ້ານນາຕໍນ້ອຍ, ອ່າງຊົນລະປະທານນ້ຳຕຽນ ແລະຊົນລະປະທານອ່າງຫ້ວຍແຄນ, ປະກອບດ້ວຍປາປາກ ແລະປາອິນເດຍໃນໂອກາດນີ້ການນຳຂອງແຂວງ, ເມືອງຍັງໄດ້ຮ່ວມກັນປູກຕົ້ນໄມ້ຄູນອິນເດຍຢູ່ແຄມເດີ່ນສະໜາມຫຼວງຈຳນວນ 20 ຕົ້ນ.
ທີ່ແຂວງຫຼວງນ້ຳທາ: ໃນຕອນເຊົ້າວັນທີ 13 ກໍລະກົດ 2016 ນີ້ຢູ່ທີ່ເດີນໂຮງຮຽນບ້ານຫາດຍາວ, ໄດ້ຈັດພິທີປ່ອຍປາ ແລະອະນຸຮັກສັດນໍ້າ-ສັດປ່າມິດຕະພາບລະຫວ່າງພະແນກຊັບພະຍາກອນທຳມະຊາດ ແລະສິ່ງແວດ ລ້ອມແຂວງຫຼວງນໍ້າທາ(ສປປ ລາວ) ກັບຫ້ອງການກະສິກຳກິ່ງ ແຂວງສິບສອງພັນນາ ແຂວງຍຸນນານ (ສປ ຈີນ) ໂດຍການເຂົ້າ ຮ່ວມຂອງທ່ານ ຄຳເຫຼັກ ໄຊດາລາ ກຳມະການພັກແຂວງຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງຫຼວງ ນໍ້າທາ, ທ່ານ ສີເວີສົງ ຫົວໜ້າສະຖານີສົ່ງເສີມເຕັກນິກສັດນໍ້າ ພະແນກກະສິກໍາກິ່ງແຂວງສິບສອງພັນນາແຂວງຍຸນນານ ສປ ຈີນ ພ້ອມຄະນະ, ມີບັນດາຫົວໜ້າ-ຮອງຫົວໜ້າພະແນກການອ້ອມ ຂ້າງແຂວງ, ເມືອງ ແລະພາກ ສ່ວນກ່ຽວຂ້ອງເຂົ້າຮ່ວມ.
ສຳລັບປາທີ່ນຳມາປ່ອຍໃນ ຄັ້ງນີ້ໄດ້ຮັບການຊ່ວຍເຫຼືອຈາກພະແນກກະສິກຳກິ່ງແຂວງສິບ ສອງພັນນາຈຳນວນ 1 ແສນ 2 ພັນໂຕ, ໃນນັ້ນມີປາໄນ 1 ແສນໂຕ ແລະປາເຄິງ 2 ພັນໂຕ, ໄດ້ແບ່ງໃຫ້ 5 ເມືອງໆລະ 750 ໂຕ, ພິທີດັ່ງກ່າວໄດ້ປ່ອຍປາລົງສູ່ວັງສະ ຫງວນ 8 ມີນາ, ມີເຂດແດນແຕ່ຫາດລຸ່ມຂົວວັງເງີນຫາຂົວອູ່ບ້ານຫາດຍາວ.
ໃນໂອກາດນີ້ທ່ານ ສີເວີສົງ ຫົວໜ້າສະຖານີສົ່ງເສີມ ເຕັກນິກ ສັດນໍ້າ ພະແນກກະສິກໍາ ກິ່ງແຂວງສິບສອງພັນນາແຂວງຍຸນນານໄດ້ກ່າວມອບປາທີ່ນຳມາປ່ອຍໃນຄັ້ງນີ້ ແລະກ່າວຮັບໂດຍທ່ານ ຄຳເຫຼັກ ໄຊດາລາ ຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງຫຼວງນໍ້າທາພ້ອມ ດຽວກັນນີ້ພາກສ່ວນທີ່ເຂົ້າຮ່ວມກໍໄດ້ພ້ອມກັນປ່ອຍປາລົງສູ່ແມ່ນ້ຳທຳມະຊາດ ແລະວັງສະຫງວນຕື່ມອີກ.
ທີ່ມາ ເສດຖະກິດ ສັງຄົມ
