ໄດ້ຍິນຄໍາສຸພາສິດກ່າວວ່າ: “ໄຫໃຫຍ່ລົ້ນໄຫນ້ອຍບໍ່ເຕັມ” ເບື້ອງຕົ້ນກໍຄິດເປັນເລື່ອງຫລິ້ນໆ ແລະ ບໍ່ໄດ້ມີຫຍັງພິເສດທີ່ຄວນຈະເກັບມາຄິດໃສ່ສະໜອງຫຍັງຫລາຍເລີຍ ແຕ່ບາງເອີນຜູ້ຂຽນຫາກໍກັບມາຈາກບັນດາແຂວງພາກກາງ ແລະ ພາກໃຕ້ໝາດໆຈິ່ງຮູ້ສຶກວ່າບາງຄັ້ງມັນກໍຖືກຕ້ອງ ແລະ ສອດຄ່ອງກັບພຶດຕິກໍາຕົວຈິງໃນສັງຄົມລະຫວ່າງຜູ້ທຸກກັບຜູ້ຮັ່ງ ລວມທັງແຕກໂຕນກັນລະຫວ່າງຄົນດໍາລົງຊີວິດຢູ່ສູນກາງ ແລະ ທ້ອງຖິ່ນ ເຊິ່ງຄົນໃນສັງຄົມບໍ່ຄ່ອຍມັກຍົກຂຶ້ນມາເວົ້າ ຂະນະທີ່ ຄວາມເປັນຈິງນັ້ນພັກ-ລັດຖະບານຍາມໃດກໍໃຫ້ຄວາມສໍາຄັນ ເປັນຫ່ວງເປັນໄຍ ແລະ ເອົາໃຈໃສ່ຢ່າງສຸດກົກສຸດປາຍເພື່ອເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າຢູ່ດີກິນດີ ບ້ານເມືອງມີຄວາມສະຫງົບສຸກ ແລະ ປະເທດຊາດໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງຕາມເສັ້ນທາງກ້າວຂຶ້ນສູ່ສັງຄົມ.
ເດືອນຜ່ານມາ, ຜູ້ຂຽນໄດ້ແບກກະເປົາເຄື່ອງພ້ອມຖົງກ້ອງຖ່າຍຮູບ ແລະ ໃສ່ໂສ້ງຂາສັ້ນເກົ່າໆເດີນທາງມຸ່ງໜ້າສູ່ບັນດາແຂວງພາກໃຕ້-ພາກກາງຂອງ ສປປ ລາວ ພໍເມື່ອຂັບລົດຈາກນະຄອນຫລວງວຽງຈັນເຖິງແຂວງສະຫວັນນະເຂດກໍໃຊ້ເວລາປະມານ 4 ຊົ່ວໂມງກວ່າກັບໄລຍະທາງ 400 ກວ່າກິໂລແມັດ ໃນເວລາຂັບໄປນັ້ນ ຜູ້ຂຽນໄດ້ຍິນສຽງໂທລະສັບຈາກເພື່ອນນັກຂ່າວໂທລະສັບມາຫາພ້ອມແນະນໍາວ່າຢ່າລືມມາແວະຢ້ຽມຢາມເຮືອນ ແລະ ຮັບປະທານອາຫານຄາບທ່ຽງເດີເພາະດົນແລ້ວບໍ່ໄດ້ເຫັນໜ້າກັນ ສຸດທ້າຍກໍໄດ້ຕັດສິນໃຈແວະຢ້ຽມຢາມຕາມມາລະຍາດ ແລະ ຄວາມເປັນມິດສະຫາຍໃນອຸດົມການດຽວກັນ ພາຍຫລັງກິນອາຫານທ່ຽງແລ້ວ ແລະ ສືບຕໍ່ໂອ້ລົມແລກປ່ຽນຄວາມຄິດເຫັນຕາມພາສາຄົນເຮັດຂ່າວ ເຊິ່ງເພື່ອນຂອງຜູ້ຂຽນລາຍນີ້ໄດ້ລັ່ນວາຈາວ່າເຮົາຈະພາໂຕໄປ ພົບ ນັກທຸລະກິດໃຈບຸນ ມີນາມວ່າ ທ່ານ ເກຍ ອູ໊ສິດທິເດດ ຈາກເປັນກໍາມະກອນຮັບຈ້າງຂົ້ວກາເຟອະດີດກາຍເປັນນັກທຸລະກິດໂດ່ງດັງ ແລະ ເປັນນັກພັດທະນາແຫ່ງຊາດໂດຍເລີ່ມຜົນງານອັນໂດດເດັ່ນຄືເດ່ມືເຂົ້າໄປຊ່ວຍເຫລືອສ້າງງານ, ສ້າງອາຊີບ ແລະ ປົວແປງຊີວິດການເປັນຢູ່ໃຫ້ຜູ້ທຸກຍາກ ຫລື ຄົນຂໍທານ 27 ຄອບຄົວຢູ່ ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ຂະນະທີ່ ນັກທຸລະກິດລາຍນີ້ຢືນຢັນວ່າໄດ້ຊັບຕົນເອງປະມານ 6 ຕື້ກວ່າກີບໂດຍບໍ່ຫວັງຜົນຕອບແທນເພື່ອເຮັດໃຫ້ກຸ່ມຜູ້ທຸກຍາກ ແລະ ຂໍທານເຫລົ່ານັ້ນຫັນກັບມາເຮັດອາຊີບທີ່ໝັ້ນຄົງ ແລະ ປະຖິ້ມອາຊີບຂໍທານ.
ຫລ້າສຸດ ທ່ານ ເກຍ ອູ໊ສິດທິເດດ ເຈົ້າຂອງທຸລະກິດ ( ບໍລິສັດອຸດົມຊັບ ແຮ່ຊາຍ, ບໍລິສັດອຸດົມຊັບກໍ່ສ້າງຈໍາກັດຜູ້ດຽວ ແລະ ໂຮງງານຜະລິດນໍ້າກ້ອນ ແລະ ນໍ້າດື່ມປາໂລມາຄໍາໃຫ້ສໍາພາດຕໍ່ນັກຂ່າວສໍານັກຂ່າວສານປະເທດລາວຫວ່າງບໍ່ດົນມານີ້ວ່າ: ຊຸມປີ 1964 ຕົນເອງໄດ້ປົບໜີສົງຄາມ ແລະ ຫລົບຊ້ອນຢູ່ດົງປ່າຕືບເຂດຊາຍແດນລາວ-ຫວຽດນາມໃນແຂວງສະຫວັນນະເຂດເພາະຢ້ານເຮືອບິນຝ່າຍກົງກັນຂ້າມຖິ້ມລະເບີດໃສ່ຫົວ ໃນນັ້ນເວລານັ້ນຄອບຄົວພໍ່ແມ່ຂອງຕົນເອງກໍບໍ່ໄດ້ມີໂອກາດປະກອບອາຊີບ ແລະ ບໍ່ມີເວລາຄ້າເຕັມເມັດເຕັມໜ່ວຍ ທັງໆທີ່ພໍ່ແມ່ຢືດຖືອາຊີບຄ້າຂາຍ ແຕ່ມາຮອດຊຸມປີ 1970-1980 ຍົກຍ້າຍເຂົ້າມາຊອກຊອກວຽກເຮັດງານທໍາ, ເປັນກໍາມະກອນຮັບຈ້າງຂົ້ວກາເຟຢູ່ເມືອງໄກສອນພົມວິຫານ ແຂວງສະຫວັນນະເຂດ ເວລາຕໍ່ມາຫັນຕົວເອງເຮັດທຸລະກິດຄ້າຂາຍ, ໂຮງຕົ້ມເຫລົ້າ, ໂຮງນໍ້າກ້ອນໄປພ້ອມໆກັນກັບປະຢັດ ແລະ ເກັບອອມຈົນທຸລະກິດແຕກດອກອອກຜົນເຖິງປັດຈຸບັນ.
ທ່ານ ເກຍ ອະທິບາຍວ່າ: ການເຮັດທຸລະກິດຂອງຕົນສ່ວນໃຫຍ່ແມ່ນຕິດພັນກັບ ການໃຫ້ສັງຄົມໂດຍບໍ່ຫວັງຜົນຕອບແທນໃດໆ ເຊິ່ງຂັ້ນເທີງກໍເປັນຫວ່ງເປັນໄຍ ແລະ ໄດ້ມອບໃບຍ້ອງຍໍສັນ ລະເສີນ ຈໍານວນຫລາຍ ຕໍ່ມາວັນທີ 25 ພະຈິກ 2015 ນີ້ ທາງ ຂັ້ນ ເທິງເພີ່ນໄດ້ຄັດ ເລືອກເປັນນັກພັດ ທະນາ ແຂ່ງຂັນ ໃນການສ້າງຢູ່ທຳກິນປອດໃສຂາວ ສະອາດດີເດັ່ນແຫ່ງຊາດ 1 ໃນ 5 ຄົນ ໃນບັ້ນສະຫລຸບແຂ່ງຂັນຮັກຊາດ.
ປີ 2015 ທ່ານໄດ້ປະກອບສ່ວນທຶນຕົນເອງ 2 ຕື້ກວ່າກີບເຂົ້າໃນໂຄງການລຶບລ້າງຄວາມທຸກຍາກຊ່ວຍປະຊາຊົນ 27 ຄອບຄົວເປົ້າໝາຍຢູ່ ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນເພື່ອ ເຮັດໃຫ້ເຂົາເຈົ້າມີການດຳລົງຊີວິດດີຂຶ້ນ, ຫຍັບຫ່າງອອກຈາກການໄປຂໍທານ, ຮູ້ອອກແຮງງານເພີ່ມພູນຜະລິດຜົນ ສ້າງເສດຖະກິດຄອບຄົວແບບກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງໃຫ້ຕົນເອງ ເຊິ່ງໂຄງການດັ່ງກ່າວໄດ້ສະໜອງເຂົ້າກິນຈຳນວນ 34.000 ກວ່າກິໂລມູນຄ່າ 158 ລ້ານກວ່າກີບ, ເຈາະນ້ຳບາດານ ຈຳນວນ 75 ໜ່ວຍ, ແອ່ງໃສ່ນ້ຳ 120 ໜ່ວຍ, ບຸກເບີກເນື້ອທີ່ນາ 110 ເຮັກຕາ, ແນວພັນເຂົ້າ 7.000 ກິໂລ, ສ້ອມແປງໂຮງຮຽນ-ຫ້ອງນໍ້າ, ຈັດສັນເນື້ອທີ່ສວນປູກພືດຕ່າງໆ 90 ຕອນ 42.870 ເຮັກຕາ, ມອບເຄື່ອງນຸ່ງຫົ່ມ, ອຸປະກອນການຮຽນ, ໜໍ່ກ້ວຍ 2. 000 ໜໍ່, ມັນຕົ້ນ, ໜໍ່ພ້າວ ແລະ ອື່ນໆ ພ້ອມດຽວກັນ ກໍຍັງໄດ້ຝຶກວິຊາຊີບໃຫ້ຄົນຂໍທານ, ເຊີນວິຊາການດ້ານປູກເຂົ້າ ລົງວິໄຈດິນນາ ແລະ ແນວພັນເຂົ້າທີ່ຈະປູກ ພ້ອມທັງແນະນຳວິທີການປູກ, ການບົວລະບັດຮັກສາ ແລະ ເກັບກ່ຽວຜົນລະປູກ, ນອກຈາກນັ້ນ, ໄດ້ຮ່ວມມືກັບ ສູນຈັດສັນອາຊີບຄົງທີ່ ຂອງເມືອງຈຳພອນ ເກັບຊື້ຜົນຜະລິດຈາກຊາວບ້ານ ເພື່ອສ້າງລາຍຮັບໃຫ້ເຂົາເຈົ້າ.
ໃນປີ 2016 ຂ້າພະເຈົ້າເຫັນວ່າຍັງມີຄວາມຈຳເປັນຫລາຍ ແລະ ໄດ້ຮັບຕື່ມອີກ 50 ຄອບຄົວ ເປັນ 70 ກວ່າຄອບຄົວກັບ 484 ຄົນ ເຊິ່ງປັດຈຸບັນນີ້ຊີວິດການຢູ່ຂອງເຂົາເຈົ້າໄດ້ຮັບການປັບປຸງດີຂຶ້ນກວ່າເກົ່າຫລາຍເທົ່າ ແລະ ກຸ່ມເປົ້າໝາຍກໍໄດ້ຢຸດໄປເລາະຂໍທານໄດ້ 90%. ສໍາລັບແຜນໃນຕໍ່ໜ້າຍັງສືບຕໍ່ຊ່ວຍເຫລືອປະຊາຊົນຢູ່ບ້ານໂນນຄ້າໃນ 30 ຄອບຄົວ ແຕ່ບໍ່ແມ່ນບ້ານເປົ້າໝາຍ ເຊິ່ງ ພວກເຮົາ ກຳລັງລົງໄປຊ່ວຍ ເປັນຂັ້ນຕອນທີ 2. ລະຫວ່າງວັນທີ 26 ມັງກອນ 2017 ຜ່ານມານີ້, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວກໍໄດ້ລົງເຄື່ອນໄຫວຢ້ຽມຢາມ ແລະ ໃຫ້ທິດຊີ້ນຳທາງ ອຳນາດການປົກຄອງເມືອງສົມທົບກັບບໍລິສັດທີ່ໄກ້ຄຽງ ແລະ ໂຮງງານຜະລິດນໍ້າກ້ອນ ແລະ ນໍ້າດື່ມປາໂລມາຄໍາຂອງພວກເຮົານີ້ ໄປຊ່ວຍອີກ ເພາະເຫັນຫລາຍຄອບຄົວຖອຍຫ່າງຈາກການຂໍທານກິນ ໂດຍຟື້ນຖານ ປັດຈຸບັນນີ້ ໃນເຂດດັ່ງກ່າວກຳລັງເກີດໜໍ່ແໜງ ໃຫ້ປະຊາຊົນຮູ້ການປູກຝັງ, ລ້ຽງສັດ ເພື່ອປະກັນໃຫ້ເຂົາເຈົ້າກຸ້ມກິນ ແລະ ຢູ່ໄດ້ດ້ວຍຕົນເອງ. ພາບ-ຂ່າວ: ເກີດຂວັນໃຈ
