ທີມຊາດລາວ U-13 ລົງແຂ່ງຂັນນັດຊີງຊະນະເລີດ ໃນວັນພຸດ 3 ສິງຫາ 2016 ສາມາດເອົາຊະນະທີມ Jeongsa Academy (Malaysia) ຈາກມາເລເຊຍ 3-0 ພ້ອມທັງຄອງຊະນະເລີດລາຍການແຂ່ງຂັນເຕະບານເພື່ອມິດຕະພາບ ລະຫວ່າງເຍົາວະຊົນອາຊຽນ-ຈີນ ຫຼື 2016 soong ching ling cup china-asean youth football friendly match ໃນລະຫວ່າງວັນທີ 28 ກໍລະກົດ ຫາ 4 ສິງຫາ 2016 ທີ່ນະຄອນຫຼວງປັກກິ່ງ ສປ ຈີນ.
ສຳລັບການແຂ່ງຂັນດັ່ງກ່າວມີ 10 ທີມເຂົ້າຮ່ວມ ແບ່ງອອກເປັນ 2 ກຸ່ມຄື: ກຸ່ມ A ປະກອບມີ SHENZEN (ສປ ຈີນ) Yanbian (ສປ ຈີນ) ມາເລເຊຍ ຫວຽດນາມ ແລະ ມຽນມາ ກຸ່ມ B ປະກອບມີ ປັກກິ່ງ (ສປ ຈີນ) ອິນໂດເນເຊຍ ລາວ ກຳປູເຈຍ ແລະ ໄທ.
ຜ່ານການແຂ່ງຂັນຜົນປາກົດວ່າ: ທີມຊາດລາວ U-13 ໃນຮອບແບ່ງກຸ່ມ ລົງແຂ່ງຂັນ 4 ນັດ ຊະນະ 3 ສະເໝີ 1 ມີ 10 ຄະແນນ ເຊິ່ງນັດທຳອິດ ໃນວັນທີ 31 ກໍລະກົດ 2016 ຊະນະ ອິນໂດເນເຊຍ 3-0 ນັດທີສອງ ສະເໝີປັກກິ່ງ 1-1 ນັດທີສາມ ວັນທີ 1 ສິງຫາ 2016 ຊະນະ ກຳປູເຈຍ 7-0 ແລະ ນັດທີສີ່ ວັນທີ 2 ສິງຫາ 2016 ຊະນະ ໄທ 8-0 ສຳລັບຮອບຊີງຊະນະເລີດ ໃນວັນທີ 3 ສິງຫາ 2016 ກໍສາມາດເອົາຊະນະ Jeongsa Academy (Malaysia) 3-0 ພ້ອມທັງຄວ້າແຊັມມາຄອງ.
ສະຫຼຸບອັນດັບຊະນະເລີດ ທີມຊາດລາວ U-13 ຮອງຊະນະເລີດ Jeongsa Football Academy (Malaysia) ອັນດັບສາມ Yanbian (China) ນັກກີລາດີເດັ່ນປະຈຳລາຍການ ທ້າວ ສີສຸພົນ ອັກຄະວົງ ນັກກີລາທີ່ຍິງປະຕູຫຼາຍທີ່ສຸດ 7 ປະຕູ ຜູ້ຮັກສາປະຕູດີເດັ່ນ ທ້າວ ບຸດເທວາ ຄຳດີ ເສຍ 1 ປະຕູ ຈາກ ສປປ ລາວ ສ່ວນທີມຊາດກຳປູເຈຍ ໄດ້ຮັບລາງວັນທີມມາລະຍາດດີເດັ່ນ.
